Օբաման ուղղակի պատասխանատվություն է կրում Օռլանդոյի ողբերգության համար. Մաքքեյն
ԱՄՆ նախագահ Բարաք Օբաման «ուղղակի պատասխանատվություն» է կրում Օռլանդո քաղաքի գեյ-ակումբում զանգվածային սպանության համար: TASS-ի հաղորդմամբ՝ հինգշաբթի լրագրողներին այսպիսի կարծիք է հայտնել ԱՄՆ Կոնգրեսի Սենատի զինված ուժերի հարցերով կոմիտեի նախագահ հանրապետական Ջոն Մաքքեյնը: «Բարաք Օբաման ուղղակի պատասխանատվություն է կրում դրա համար, քանի որ երբ նա դուրս բերեց բոլորին (զորքերը) Իրաքից, «Ալ-Քաիդան» ուղևորվեց Սիրիա և վերածվեց ԴԱԻՇ-ի»,- ասել է օրենսդիրը: «ԴԱԻՇ-ը դարձել է այն, ինչ հիմա ներկայացնում է իրենից՝ Իրաքից բոլորին դուրս բերելու Բարաք Օբամայի անհաջող, բացարձակ անհաջող որոշման պատճառով, նաև մտածողության պատճառով, թե մեր գնալով՝ հակամարտությունները ավարտվում են»,- հավելել է նա: «Ուստի դրա (Օռլանդոյի ողբերգության) պատասխանատվությունը նախագահ Բարաք Օբամայի և նրա տապալված քաղաքականության վրա է»,- ասել է Մաքքեյնը: Ավելի ուշ սենատորը հայտարարություն է տարածել, որում նա փոքր-ինչ խմբագրել է իր դիրքորոշումը. «Ես նկատի չունեի, որ նախագահն անձնական պատասխանատվություն է կրում: Ես խոսում էի ազգային անվտանգության ոլորտում Օբամայի որոշումների, ոչ թե անձամբ նախագահի մասին»,- պարզաբանել է նա:
Հետևեք մեզ Viber-ում
