Թուրքական մետրոյի նորամուծությունը՝ միայն կանանց համար

Անկարայի քաղաքապետ Մելիհ Գյոկչեքը հայտնել է, որ Twitter-ում իր կատարած հարցման համաձայն, կանանց 52 տոկոսը համաձայն է, որ մետրոյում վագոններն առանձնացվեն տղամարդկանց եւ կանանց համար: Ինչպես հայտնել են թուրքական ԶԼՄ-ները, Թուրքիայի մայրաքաղաքի քաղաքապետի հարցմանը մասնակցել է 80 հազար մարդ: ТАСС-ի փոխանցմամբ՝ Գյոկչեքը որպես օրինակ է բերել Ճապոնիան, որտեղ կիրառվում է մետրոյում վագոններն ըստ սեռի տարանջատելու միջոցը՝ կանանց սեռական ոտնձգություններից պաշտպանելու համար: Նշվում է, որ Թուրքիայում հասարակական տրանսպորտի գերբեռնվածության պատճառով կանայք հաճախ բողոքում են ավտոբուսներում, տրամվայներում կամ մետրոյում տղամարդկանց անթույլատրելի վարքից, ինչը եւ հասարակական լայն քննարկումների առարկա է դառնում այդ երկրում: