Պենտագոնում խոստացել են Թուրքիային օգնել «ռուսական ագրեսիային դեմ-հանդիման»
Պենտագոնի ղեկավար Էշթոն Քարտերը Թուրքիայի պաշտպանության նախարար Ֆիկրի Իշիկին աջակցություն է խոստացել «ռուսական ագրեսիային դեմ-հանդիման», երեքշաբթի հայտնել է Պենտագոնը: ԱՄՆ-ի եւ Թուրքիայի պաշտպանության նախարարների հանդիպումը տեղի է ունեցել Բրյուսելում` ՆԱՏՕ-ի նախարարական նիստի շրջանակում: «Նախարար Քարտերը հաստատել է, որ ԱՄՆ-ն նվիրված է Թուրքիայի անվտանգության պաշտպանությանը` ռուսաստանյան ագրեսիային եւ մի շարք ահաբեկչական սպառնալիքներին դեմ-հանդիման», — ասված է Պենտագոնի հաղորդագրության մեջ, տեղեկացնում է «ՌԻԱ Նովոստին»: Հանդիպմանը քննարկվել է նաեւ միգրացիայի եւ Թուրքիայի սահմանների ամրապնդման թեման, հայտնել է Պենտագոնը: Ռուսաստանի եւ Թուրքիայի հարաբերությունները ճգնաժամ են ապրում այն բանից հետո, երբ 2015-ի նոյեմբերի 24-ին թուրքական կործանիչը Սիրիայում խոցել էր ռուսական Սու-24 ռմբակոծիչը: Ռուսաստանի նախագահ Վլադիմիր Պուտինը դա կոչել էր ահաբեկիչների հանցակիցների կողմից «թիկունքին հարված» եւ Թուրքիայի նկատմամբ մի շարք տնտեսական սահմանափակումներ էր մտցրել: Երկրի նոր վարչապետ Բինալի Յիլդիրիմը հայտնել է, որ Անկարան կձգտի երկխոսության միջոցով Ռուսաստանի հետ հարաբերությունների նորմալացման:
Հետևեք մեզ Viber-ում
