Ադրբեջանում պաշտոնյաներ են ձերբակալվել
Ադրբեջանի Պետական անվտանգության ծառայության աշխատակիցները Գերանբոյի շրջանում հատուկ գործողության ժամանակ ձերբակալել են պաշտոնյաների, որոնք զբաղվում էին ոսկու ապօրինի որոնումներով եւ հանքահանմամբ։ AzNews.az–ի տեղեկություններով՝ մի խումբ մարդիկ, որոնց մեծ մասը՝ պաշտոնյաներ, Ոսկյա Կուրգան կոչվող վայրում զբաղվում էին ոսկու ապօրինի որոնումներով։ Հատկանշական է, որ այդ տարածքը, որը գտնվում է Թափգարագոյունլու գյուղի մոտ, նախքան ապրիլյան իրադարձությունները չեզոք գոտի էր հայկական եւ ադրբեջանական զորքերի միջեւ։ «Ապրիլյան մարտերից հետո այդ տարածքը հայտնվել էր տեղի պաշտոնյաների ուշադրության կենտրոնում, որոնք ոսկի գտնելու համար ծանր տեխնիկայով հորատում էին տարածքը»,– ասել է գործակալության աղբյուրը։ Կայքի տեղեկություններով՝ ձերբակալվածների թվում են Գերանբոյի շրջանի գործադիր մարմնի ղեկավարի օգնական Ֆուադ Ալիեւը, Ճանապարհային վարչության պետի տեղակալ Միսիր Ալեքպերովը եւ այլք։ ՊԱԾ–ից դեռ չեն մեկնաբանել Գերանբոյի շրջանում հատուկ գործողությունների փաստը։
Հետևեք մեզ Viber-ում
