WikiLeaks-ը կբացահայտի
WikiLeaks-ի հիմնադիր Ջուլիան Ասանժը խոստացել է Հիլարի Քլինթոնի էլեկտրոնային փոստից նոր նամակներ հրապարակել, որոնք նա ստացել եւ ուղարկել է ԱՄՆ պետքարտուղարի պաշտոնում աշխատելու ընթացքում: Ըստ ՌԻԱ Նովոստիի, Դեմոկրատական կուսակցությունից ԱՄՆ նախագահի թեկնածու Քլինթոնի նկատմամբ ՀԴԲ-ն հետաքննություն է վարում: Այն փորձում է, մասնավորապես, պարզել, արդյո՞ք Քլինթոնը դաշնային օրենք է խախտել, երբ գաղտնի տեղեկատվություն ուղարկելու համար անձնական էլեկտրոնային փոստն է օգտագործել: WikiLeaks-ի հրապարակումների համաձայն, 2009-2013 թվականներին Հիլարի Քլինթոնն անձնական էլեկտրոնային փոստով գաղտնի ծառայողական նամակագրություն է վարել: Փորձագետների կարծիքով, դա նրան թույլ է տվել թաքցնել նամակագրությունը պետական ստուգումներից, ինչն արգելվում է պետական ծառայողներին: ՀԴԲ-ն առայժմ չի որոշել, արդյո՞ք պետք է հետաքննություն սկսել՝ կապված տվյալների հնարավոր արտահոսքի հետ:
