Պոմիդորով հնարավոր չէ հակառակորդի ագրեսիայի դեմ պայքարել. պատգամավոր

ԱԺ «Հայ ազգային կոնգրես» խմբակցության պատգամավոր, «Քաղաքացիական պայմանագիր» կուսակցության վարչության անդամ Նիկոլ Փաշինյանը, ԱԺ-ում այսօր անդրադառնալով 2015 թվականի պետական բյուջեի կատարողականին, ասաց, որ 2015 թվականի պետական բյուջեի կատարողականը նախորդ տարիների կատարողականների նման «հուսահատ ու տխուր» փաստաթուղթ է: Ըստ նրա` 2015թ.-ի Հայաստանի տնտեսության 3% աճի 70%-ն ապահովել է գյուղատնտեսությունը, որի աճն էլ, կառավարության խոստովանությամբ, մեծապես պայմանավորված է բնակլիմայական պայմաններով, այսինքն` եթե անցած տարի երկու հատ կարկուտ ավելի գար, երկու հատ էլ՝ անձրև, մեր տնտեսության աճը 50%-ով կկրճատվեր: «Այստեղ կան թվեր, տոկոսներ, անկումներ և նույնիսկ աճեր, բայց ինչպես նախորդ տարիներին՝ չկա ամենակարևորը՝ ռազմավարություն, թե մենք ինչպիսին ենք ուզում դարձնել մեր տնտեսությունը»,-ասաց նա։ Ըստ ԱԺ պատգամավորի՝  գիտելիքահենք տնտեսություն ստեղծելու խոստումներից հետո ՀՀ-ում ստեղծվել է «պոմիդորահեն տնտեսություն»։ «Մենք պետք է ջարդենք մեր դեմ սրված այդ ատամները, և սա ոչ թե քմահաճույքի կամ լոպազության, այլ լինել-չլինելու հարց է: Հայաստանի դեմքն ու ողնաշարը պետք է լինեն ինդուստրիալ հիմքի վրա դրված բարձր տեխնոլոգիական ռազմաարդյունաբերական համալիրը, որովհետև պոմիդորով թշնամու ագրեսիայի առաջը չես առնի: Սա նշանակում է, որ ՀՀ իշխանության ղեկին պետք է լինեն մարդիկ, որոնց ուշքն ու միտքը ոչ թե՝ պոմիդորի միջազգային գներն են ու հոծ գիծ տրորողներին հանուն ընտանեկան բարեկեցության քերթելը, այլ նրանք, որոնք ՀՀ-ն տեսնում են բարձր ինդուստրիալ երկիր»,- ասաց Ն.Փաշինյանը: Նրա խոսքով՝ քառօրյա պատերազմը տվեց, որ «ագրարային նրբերանգներով» Հայաստանը շանս չունի գոյատևելու այս տարածաշրջանում: «Որովհետեւ արևելքում ու արևմուտքում կան հեռավոր երկրներ, որոնք ատամները սրած սպասում են, թե երբ պետք է գա Հայաստանը խժռելու պահը՝ որպես բանջարեղենամրգային դեսերտ: Պետք է ջարդել այդ ատամները, քանի որ մեր լինել-չլինելու հարցն է»,-ասաց նա: Պատգամավորն ասաց, որ  պոմիդորով հնարավոր չէ հակառակորդի ագրեսիայի դեմ պայքարել: