Աթեշյանը այլ ելք չունի, քան քաջություն գտնել և հրաժարվել փոխանորդի աթոռից.Հրանուշ Խառատյան
Ազգագրագետ Հրանուշ Խառատյանը` անդրադառնալով մի քանի օր առաջ փոխանորդ Աթեշյանի` Թուրքիայի նախագահ Էրդողանին հղած տխրահռչակ նամակին,Հայելի ակումբում հրավիրված ասուլիսում հայտարարեց. «Թուրքիայում մեր բոլոր պատրիարքներն էլ եղել են ծանր վիճակում, միշտ եղել են թիրախ: Բայց պատրիարքի անձը և գործը նույնպես զգալի դեր են խաղացել: Այնինչ դատելով Արամ Աթեշյանի` Պոլսո պատրիարքի փոխանորդ ընտրվելու պահից նրա վարած քաղաքականությունից` պատրիարքարանը դարձել է գործիք Թուրքիայի իշխանության ձեռքին: Նա այրում է բոլոր կամուրջները թրքահայության հետ թե որպես անձ, թե որպես կառույցի ղեկավար: Բացի այդ, իր այս քայլով հարվածի տակ է դնում Թուրքիայի հայերի մի զգալի հատվածի, ով եթե նույնիսկ շատ հստակ չի բարձրաձայնում, բայց համենայնդեպս չի ցավում, օրինակ, Բունդեսթագի կողմից ցեղասպանության ընդունման բանաձևի կապակցությամբ»: Հ. Խառատյանը բերեց Պոլսո պատրարք Շնորհք արքեպիսկոպոս Գալստյանի օրինակը, ով բավականին բարդ ժամանակներում, երբ 1965 թ. նշվում էր Հայոց Ցեղասպանության 50-ամյակը, դեմ գնաց Թուրքիայի իշխանություններին, չընկրկեց նրանց ճնշումների առջև, երբ փորձ էր արվում պատրիարքի միջոցով դատապարտել Ցեղասպանության տարելիցին նվիրված քայլերը: Սակայն Թուրքիայի իշխանություններին Աթեշյանը և մյուսները հարկավոր են այնքան ժամանակ, քանի դեռ անում են իրենց թելադրածը: Դրա վառ օրինակը Պոլսո պատրիարք Մեսրոպ Մութաֆյանն է: Ամեն տեղ Էրդողանը իր հետ տանում էր Մութաֆյանին` ցույց տալու, թե որքան են կարևորում փոքրամասնության ներկայացուցչին, այն էլ հայերի: Իսկ երբ մեկ անգամ պատրիարքն իրեն թույլ տվեց ասել, որ ցեղասպանություն եղել է, դարձավ «կենդանի» դիակ: Արամ Աթեշյանը գտնվում է այնպիսի ծանր վիճակում, որ այլ ելք չունի, քան քաջություն գտնել և հրաժարվել փոխանորդի աթոռից,հայտարարեց ազգագրագետը:
Հետևեք մեզ Viber-ում
