Նուլանդ. «Մենք պահպանելու ենք Ռուսաստանի ժողովրդի հետ կապերը» (տեսանյութ)

Չնայած պաշտոնական Մոսկվայի հետ առկա հակասություններին, Միացյալ Նահանգները շարունակելու է ամուր կապեր պահպանել Ռուսաստանի ժողովրդի հետ, Սենատում անցած լսումների ընթացքում հայտարարել է ԱՄՆ-ի պետքարտուղարի օգնական Վիկտորիա Նուլանդը. «Մենք պահպանելու ենք Ռուսաստանի ժողովրդի հետ կապերը՝ ապագայում ավելի կառուցողական հարաբերությունների ներուժ ապահովելու նպատակով»: Նուլանդի խոսքով, Մոսկվայի հետ հարաբերություններում Վաշինգտոնն առաջնահերթությունը դնում է չորս կետերի վրա, որոնցից երկուսը վերաբերում են ԱՄՆ-ի եւ դաշնակիցների պաշտպանության ամրապնդման եւ ռուսական հնարավոր գրոհի կանխմանը: Մյուս երկու կետերը վերաբերում են ընդհանուր շահերի շուրջ համագործակցության զարգացմանը. «Մենք շարունակելու ենք համագործակցել անվտանգության առանցքային այն առաջնությունների ուղղությամբ, որոնց շուրջ մեր շահերը համընկնում են Ռուսաստանի շահերի հետ»: Լսումների ընթացքում ԱՄՆ-ի սենատորներից շատերը գործադիր իշխանության ներկայացուցիչներից պահանջում էին խստացնել Ռուսաստանի դեմ պատժամիջոցները, քանի որ, նրանց խոսքով, Մոսկվայի ներկա քաղաքականությունը լավատեսության առիթ չի տալիս: «Մենք իրոք Ռուսաստանի վարչակարգի հետ ունենք ընդհանուր շահեր, որոնք անհրաժեշտ է իրականացնել, սակայն, մենք երբեւէ չենք կարող մոռանալ մեր սկզբունքները կամ մարդու իրավունքների խախտումների վրա աչք փակել», – նշել է սենատոր Բեն Քարդինը: Սենատոր Ռոբերտ Մենենդեզը պահանջել է ԱՄՆ-ի գործադիր իշխանությունից խստացնել պատժամիջոցները, մինչեւ դրանք իրական ազդեցություն ունենան Մոսկվայի կողմից տարվող քաղաքականության վրա. «Ես անհանգստացած եմ, քանի որ Պուտինը մեր գործողություններից պետք է կարծիք կազմի, որ համբերության սահմանների հատումը, հարձակումներն ու պատեհապաշտությունը ճիշտ մոտեցումներ չենէ»: Լսումների ընթացքում սենատոր Բոբ Քորքերը հիշեցրել է նաեւ, որ անցյալում Վաշինգտոնն ու Մոսկվան հաջողությամբ համագործակցել են պատոմւթյան ամենաբարդ պահերին. «Միասին մեր երկրները հաղթահարել են ֆաշիզմը, կանխել զանգվածային ոչնչացման զենքի տարածումը 1990-ականներին, եւ միասին պայքարել ահաբեկչության դեմ սեպտեմբերի 11-ից հետո»: Ամերիկայի ձայն