Հեղեղաջրերը լցվել են դիրքերը. մանրամասներ երկու զինծառայողների մահվան մասին

Արդեն հայտնել ենք, որ բնական աղետի` 08.06.2016թ. ժամը 00:30-ի սահմաններում տեղացած առատ անձրևից առաջացած ջրհեղեղի, ուժեղ քամու հետևանքով ծառայողական պարտականությունները կատարելու ժամանակ անհայտ կորել են N զորամասի ժամկետային զինծառայողներ` կրտսեր սերժանտ Վարդան Կարապետի Ղրմաջյանը և շարքային Արման Պավելի Գազարյանը: Yerkir.am-ին հայտնի դարձավ, որ դեպքը տեղի է ունեցել գիշերը ԼՂՀ Ջաբրայիլի տարածքում: Ուժեղ անձրևի և կարկուտի հետևանքով առաջացած հեղեղը լցվել է դիրքերը և քշել-տարել երկու զինծառայողի, տուժել է ևս հինգ զինծառայող: Մեզ հայտնի դարձավ նաև, որ Արման Գազարյանը Արարատի մարզի Նիզամի գյուղից էր: Գյուղապետ Հարութին Կարապետյանը մեզ հետ զրույցում ասաց, որ դեպքի մասին իրենք տեղեկացել են վաղ առավոտյան: Ըստ Կարապետյանի`նրանց զորավարժություններ իրականացնելու նպատակով տեղափոխել էին այլ զորամաս, որի տարածքում էլ տեղի է ունեցել դեպքը: Գյուղապետը հայտնեց նաև, որ Արմանը Գազարյանների ընտանիքի երեք որդիներից կրտսերն էր: «Ընտանիքը մեծ է: Հայր, մայր, տատիկ և երեք որդի: Արմանը ամենափոքրն էր: Նրա մեծ եղբայրը ծառայում է Ղարաբաղում, կոչումով մայոր է, միջնեկ եղբայրն էլ Երևանում է աշխատում»,- ասաց նա Մյուս զոհվածը` Վարդան Ղրմաջյանը, Էջմիածնից էր` Զվարթնոցից: