Աֆրիկայում սովը սպառնում է 14 միլիոն մարդու

RIA Novosti լրատվական գործակալության փոխանցմամբ՝ Աֆրիկայի հարավում սովը սպառնում է 14 միլիոն մարդու, որի պատճառը նախորդ տարվա խոնավության պակասն է, ստացված վատ բերքը։ Բացի այդ, ընթացիկ տարում նույնպես ակնկալվում է երաշտ։ Այդ մասին հայտնել է ՄԱԿ-ի Համաշխարհային սննդի ծրագիրը։ Նա մտահոգություն է հայտնել տվյալ տարածաշրջանում սննդի անվտանգության դրության կապակցությամբ։ Իրավիճակն ավելի սպառնալից է դառնում, քանի որ ցանքի համար բարենպաստ ժամանակն արդեն ավարտվել կամ ավարտվում է, և արդյունքում Աֆրիկայի հարավի երկրներում կարող է մեծապես աճել այն մարդկանց թիվը, որոնք չեն ունենա բավականաչափ քանակությամբ սնունդ։ Նախորդ տարի, առատ տեղումների բացակայության պատճառով ամենաշատը տուժել է Մալավին՝ 2.8 միլիոն մարդ, Մադագասկարը՝ 1.9 միլիոն մարդ, Զիմբաբվեն՝ 1.5 միլիոն մարդ։ Լեսոտոյի կառավարությունը դեկտեմբերին, երաշտի պատճառով հայտարարել է արտակարգ դրություն։