Պաշտոնյային մեկ ակսում 2 մլն 360 հազար պրեմիա տալ, աղքատների հոսանքն անջատել. Նիկոլ Փաշինյանի երջանիկ Հայաստանը

 Երևանի քաղաքապետի խորհրդական Կարեն Համբարձումյանը, ով շուտով կստանձնի Վերաքննիչ քաղաքացիական դատարանի դատավորի պաշտոնը, ապրիլ ամսա ընթացքում 2-րդ պարգևատրում է ստացել` 1 մլն 800 հազար դրամի չափով:

Քաղաքապետ Հայկ Մարությանը ապրիլի 6-ին նրան պարգևատրել էր 560.000 դրամով: Փաստորեն, մեկ ամսվա մեջ, 14 օրվա տարբերությամբ, այս պաշտոնյան պարգևատրվել է 2 մլն 360.000 դրամ գումարով: Նույնքան պարգևավճար էլ ստացել է Երևանի փոխքաղաքապետ Վիրաբյանը: Այսինքն` այս երկու պաշտոնյան միասին մեկ ամսում ստացել են 4 մլն 720 հազար դրամ պրեմիա:
Սա այն դեպքում, երբ ընդամենը 2 օր առաջ վարչապետ Նիկոլ Փաշինյանը հայտարարեց, որ անկախ արտակարգ դրությունից և երկրում հայտարարված կարանտինից` ՀՀ քաղաքացիները պարտավոր են վճարել կոմունալ վճարումները, հակառակ դեպքում երկրում համատարած կոլապս կսկվի: «Մենք սկզբում հայտարարեցինք, որ արտակարգ դրության ընթացքում վարձերը չվճարելու համար անջատումներ չեն լինելու, բայց այդ ժամանակ հույս ունեինք, որ իրավիճակը կզարգանա այնպես, որ ապրիլի 16-ին արտակարգ դրությունը կավարտվի, բայց այդպես չեղավ:
Զարգացավ այնպիսի իրավիճակ, որ այդ հայտարարության արդյունքում ոչ միայն սկսեցին չվճարել նրանք, որոնք հնարավորություն չունեն, այլ նաեւ նրանք, որոնք հնարավորություն ունեն: Մենք տեսանք, որ նաեւ հարուստ մարդիկ սկսել են չվճարել, որի պատճառն այն է, որ կառավարությունն ասել է, որ անջատումներ չեն լինելու: Փաստորեն բաժանորդները համատարած չեն վճարում ցանցերին, ցանցերը չեն վճարում արտադրողներին, արտադրողները չեն կարողանում վճարել իրենց մատակարարներին ու աշխատողներին, չեն կարողանում վճարել հարկեր:
Դրա հետեւանքով առաջանում է ռիսկ, որ մենք չենք կարողանա վճարել թոշակներ ու նպաստներ: Բայց ամենակարևոր ռիսկն այն է, որ համակարգը կարող է քանդվել: Այսինքն` կարող է խոսք լինել ոչ թե 5 հազար, 10 հազար մարդու հոսանքն անջատելու մասին, այլ ընդհանրապես էներգետիկ համակարգը չաշխատի: Հետեւաբար, գալիս է մի պահ, երբ հասկանում ենք, որ ընտրությունը ոչ թե նրա մեջ է, որ հազար կամ 5 հազար քաղաքացու հոսանքն անջատենք, թե չանջատենք, այլ նրա մեջ է՝ երկրում հոսանք ընդհանրապես լինելու է, թե չի լինելու»,- հայտարարել էր Փաշինյանը:
Հայաստանում կա 775 հազար էլեկտրաէներգիայի բաժանորդ և 623 հազար գազի բաժանորդ: Այս պահի դրությամբ, ըստ Փաշինյանի, անջատվել է 4300 էլեկտրաէներգիայի բաժանորդների հոսանք և 736 գազի բաժանորդների մատակարարումը: Ընդ որում, էլեկտրաէներգիայի անջատումների բաժանորդների պարտքը կազմում է 30 հազարից ավելի, իսկ գազի սպառողների պարագայում՝ 80 հազարից ավելի:
Հոսանքազրկված 4300 ընտանիքներից առնվազն 300-ի հոսանքի վարձի 50 տոկոսը կարելի էր փոխհատուցել ընդամենը Երևանի քաղաքապետարանի վերոնշյալ երկու պաշտոնյաների պարգևատրման գումարով` ամեն ընտանիքի հատկացնելով 15 հազարականին մոտ դրամ: Արտակարգ դրության պատճառով ահագնացող աղքատության պայմաններում սա կլիներ սոցիալական և բարոյական քայլ: Բայց իշխանությունը գերադասել է ցինիզմը: Նիկոլ Փաշինյանի իշխանությունը փաստորեն այս 4300 ընտանիքն ասում է` դուք առանց լույսի ձեր երեխաների և ծնողների հետ նստեք ձեր տանը և տեսեք, թե ինչպես եմ յուրայիններիս 2 մլն 360 հազար պրեմիա տալիս: Այսպիսով` հեղափոխության կարևոր լոզունգը` ապրելու ենք երջանիկ Հայաստանում, իրականացված է: Նայած ում համար:

Հայկ  Դավթյան