Գաստրոպոլիսի շտաբը. ի՞նչ երաշխիքներ են խոստացել Եսայանները՝ Յուքոմի դիմում գրած աշխատակիցներին

Հետաքրքիր զարգացումներ են տեղի ունենում «Յուքոմում»։ Եսայան եղբայրները իրենց պատկանող «Գաստրոպոլիս» սրճարանում շտաբ են բացել, և օր ու գիշեր մարդկանց են ընդունում, համոզում, հորդորում դիմում գրել։ Ինչպես ժողովուրդն է ասում՝ պիցա են բաժանում։ Մեզ հայտնի դարձավ, որ նախ Յուքոմի ղեկավար կազմն է այնտեղ եղել մինչև լույս ու հեռախոսով բանակցել են Յուքոմի նոր տնօրինության հետ։ Ընդ որում, բանակցությունների ժամանակ հեռախոսի բարձրախոսով են միացրել ձայն ու բարձր հռհռացել առաջարկների վրա։ Առաջարկների մեջ եղել է շանտաժի դադարեցումը, աշխատանքի բնականոն վերադարձը և հավելավճարները։

Աշխատակիցների մեջ շտաբում եղածներից մեկը, ում անունը պաշտպանում ենք հասկանալի պատճառներով, նշել է, որ եղբայրները վճռական են տրամադրված, նշելով՝ կամ հետ կգրավենք Յուքոմը, կամ «վարի կտանք»։

Ներկաները իրար մեջ քննարկել են, թե ինչ կլինի իրենց հետ, եթե Հայկի ասած «վարի կտանք» սցենարով գնա, ով է պատասխանատվություն կրելու իրենց գործազրկության համար։ Եղբայրներից փոքրը բոլորին հավաստել է, որ իրենց բիզնեսներում որևէ աշխատանք կտան կամ էլ կտեղավորեն իրենց «ազդեցիկ» ընկերների մոտ։

Ի դեպ՝ ազդեցիկներին ասելով նա գուցե նկատի է ունեցել փոխվարչապետ Տիգրան Ավինյանին և ՊԵԿ նախագահի տեղակալ Միքայել Փաշայանին։ Յոքոմում բոլորը խոսում են, որ մտերմիկ հարաբերություններ ունեն և եղբայրները մեկ անգամ չէ, որ այդ մասին ակնարկել են բոլորին։

Լուսանկարում՝ Ալեքսանդր Եսայանը Տիգրան Ավինյանի և Միքայել Փաշայանի հետ։