Կես միլիոնից ավելի վարակվածներ. ԱՄՆ-ում պիկ է, իսկ Թրամփը սպառնում է

ԱՄՆ-ում կորոնավիրուսով վարակվածների թիվն անցավ կես միլիոնից: Անցած 24 ժամվա ընթացքում ավելի քան 2100-ից ավելի մարդ է մահացել կորոնավիրուսի հարուցած բարդություններից: Վերջին 24 ժամվա ընթացքում 2108 մարդ է մահացել, որոնց մոտ կորոնավիրուս էր հայտնաբերվել։ COVID-19-ի հետ կապված նման ցուցանիշներն ԱՄՆ-ում ռեկորդային են։ Դրանից մեկ օր առաջ ԱՄՆ-ում կորոնավիրուսից 1783 մարդ էր մահացել։

Մինչդեռ Միացյալ Նահանգների նախագահ Դոնալդ Թրամփը համոզված է, որ կորոնավիրուսի հիվանդության պիկը ցած է իջնում:

Կորոնավիրուսի ամենաշատ դեպքերը արձանագրվել են Նյու Յորքի նահանգում, ԱՄՆ-ում կորոնավիրուսով վարակվածների թիվը ավելի մեծ է, քան աշխարհի ցանկացած երկրում: Բարձր է նաև մահացությունը՝ վերջին 2-3 օրերի ընթացքում 24 ժամվա կտրվածքով գրեթե 2 հազար մարդ է մահանում:

Չնայած բարձր թվերին, ԱՄՆ-ում ճգնաժամի պիկը հաղթահարելու նշաններ են երևում: Կորոնավիրուսի դեմ պայքարի խմբի անդամ, «Ալերգիկ և ինֆեկցիոն հիվանդությունների ազգային ինստիտուտ»-ի տնօրեն Էնթոնի Ֆաուչին Սպիտակ տանը կայացած մամուլի ասուլիսում հայտնել է, որ զգալիորեն նվազել է հոսպիտալացվող հիվանդների քանակը: «Միևնույն ժամանակ, երբ մենք ականատեսն ենք մահվան դեպքերի աճի, մենք տեսնում ենք նաև, որ խիստ կրճատվել է հոսպիտալացվելու կարիք ունեցող մարդկանց քանակը», - ասել է նա, նշելով, որ նախօրեին մոտավորապես 200 մարդ է հոսպիտալացվել, երբ նախկինում օրական շուրջ 1400 վարակված էր տեղափոխվում հիվանդանոցներ:
Էնթոնի Ֆաուչին նշել է, որ միտումները գնում են ճիշտ ուղղությամբ, հիվանդության զարգացումն ասես կոտրվել է, անհրաժեշտ է շարունակել նույն կերպ վարվել՝ մնալ տանը: Զգուշությունը շարունակելու վարակաբանի կոչերը հաջորդում են նախագահ Դոնալդ Թրամփի ավելի վաղ հայտարարած ցանկությանը, թե մեկ ամսից հնարավոր է վերացնել սահմանափակումները, բացել բիզնեսը:

Պատասխանելով լրագրողներից մեկի հարցին, թե բժշկական տեսակետից որո՞նք են չափանիշները, որ թույլ կտան վերաբացել բիզնեսը, «Վարակիչ հիվանդությունների ազգային ինստիտուտ»-ի տնօրենը նշել է՝ մեկ ընդհանուր չափանիշ չկա: «Օրինակ՝ ես չէի ցանկանա Նյու Յորքում հրաժարվել սահմանափակումներից, մինչ հիվանդության կորագծի կտրուկ իջնելը: Իրավիճակը տարբեր է փոքր քաղաքներում, դեպի արևմուտք կամ լեռնային շրջաններում, որտեղ իրավիճակը հիմնականում շատ լավ վերահսկվում է: Պետք է տեսնել արդյո՞ք մենք մեկուսացնելու, շփումներին հետևելու և դրանք արգելելու հնարավորություններ ունենք: Իրավիճակները իսկապես տարբերվում են, և ես չեմ կարծում, թե բժշկական մեկ չափանիշ կա», - ասել է նա:

ԱՄՆ-ի նախագահը նշել է, թե համոզված է, որ հիվանդության կորագիծը ցած է իջնում: «Մենք հիմա բլրի գագաթին ենք, գրեթե համոզված եմ, որ գագաթին ենք ու հիմա ցած ենք գնում, որոշ դեպքում գործընթացն արդեն սկսել ենք», - ասել է Թրամփը:
Նրա վարչակազմի տնտեսական հարցերով պաշտոնյաների կարծիքով՝ գալիք մայիսին գործարար ոլորտը կարող է վերադառնալ նորմալ աշխատանքի:

Սպիտակ տանը երեկ կայացած ճեպազրույցում Թրամփն ասել է, թե տարիների ընթացքում շատ բաների վերաբերյալ ճիշտ զգացողություններ է ունեցել և հիմա էլ տնտեսությունը վերաբացելու հարցում ճիշտ զգացողություններ ունի: «Կարծում եմ ամեն ինչ լավ կլինի: Կարծում եմ մեր երկիրը տնտեսապես ավելի հզոր կլինի, քան երբևէ: Մենք մեծ թռիչքի ենք պատրաստվում», - նշել է ԱՄՆ նախագահը: Տնտեսությունը վերաբացելու, սահմանափակումները վերացնելու հարցում առողջապահական համակարգի պաշտոնյաները զգուշություն են ցուցաբերում:

Իսկ Առողջապահության համաշխարհային կազմակերպությունը, որը պիտի կենտրոնանա կորոնավիրուսի համաճարակի դեմ պայքարի վրա, հայտնվում է իր ամենամեծ դոնոր պետության ղեկավարի քննադատության ներքո: Դոնալդ Թրամփը կազմակերպությանը մեղադրում է համաճարակի դեմ ագրեսիվ պայքար չծավալելու մեջ, և սպառնում է դադարեցնել այս կազմակերպության ֆինանսավորումը:

Ի պատասխան Թրամփի մեղադրանքների, կազմակերպության գլխավոր տնօրեն Թեդրոս Ղեբրեյեսուսը հանդես է գալիս միասնության կոչով ու հորդորում խուսափել ճգնաժամը քաղաքականացնելու փորձերից: «Կարիք չկա կովիդ 19-ը դարձնել քաղաքական կսմթոցների առիթ: Ձեր դիրքը դնելու համար ունեք շատ այլ ուղիներ», հայտարարել է Ղեբրեյեսուսը:

«Երբ ասում է «քաղաքականացնել», արդեն իսկ ինքն է հարցը քաղաքականացնում», ի պատասխան հայտարարում է Թրամփը ու ավելացնում, որ կազմակերպությանն է անցյալ տարի հատկացվել մոտ 500 միլիարդ դոլար ու հարյուր միլիարդավոր դոլարներ` նախորդ տարիներին: «Նրանք պիտի ավելի լավ աշխատեին այդ գումարներով», հայտարարել է Թրամփը:

Թրամփը Առողջապահության համաշխարհային կազմակերպությանը մեղադրում է նաև «չինաստանամետ» լինելու մեջ: Նա հիշեցնում է, որ կազմակերպությունը գովեստի խոսքեր է ասել համաճարակի դեմ պայքարում Չինաստանի գործողությունների մասին: «Ու այսօր շատերն են ասում, որ սա չափից շատ է այն պետության համար, որը մինչ այդ փորձում էր կոծկել Ուհանում սկսված հիվանդությունը», նշել է Թրամփը:

Ըստ «Ամերիկայի ձայնի», ինչպես վերլուծաբան Ռոբերտ Դելին է ասում, այստեղ իրոք կա հասկանալի մտահոգության առիթ, երբ կազմակերպությունը գովաբանում է Չինաստանին: «Սակայն մյուս կողմից կարելի է ենթադրել, որ Թրամփի վարչակազմը փորձում է այս կերպ կոծկել իր իսկ կողմից ուշացված քայլերը», ասում է նա:

Նույն օրը, երբ Թրամփը սպառնաց դադարեցնել կազմակերպության ֆինանսավորումը, պետքարտուղար Մայք Փոմփեոն հանդես եկավ կովիդ 19-ի դեմ համաշխարհային պայքարի համար ԱՄՆ-ի կողմից հավելյալ 225 միլիոն դոլար հատկացնելու մասին հայտարարությամբ:

Վերլուծաբաններից Դանիել Ռունդեն սա գովելի քայլ է համարում: «Եթե ուզում ենք մնալ որպես համաշխարհային առաջնորդ, ուրեմն պիտի գիտակցենք, որ աշխարհն ակնկալում է այս խնդրի լուծման գործում, որպես առաջնորդ, մեր գործողությունները»: Թրամփն, ի դեպ, հրապարակային կերպով ողջունել է այս համաճարակի դեմ պայքարում Չինաստանի դերը: Ավելի վաղ նա ասել էր, թե շատ լավ կլիներ, եթե Պեկինն այս գործում օգնության ձեռք մեկներ մյուս պետություններին:

Մետաքսյա Շալունց