Արսեն Թորոսյանը ինքնախուճապի մեջ է

Ազգային ժողովի Առողջապահության և սոցիալական հարցերի մշտական հանձնաժողովի նիստի ժամանակ առողջապահության նախարար Արսեն Թորոսյանի արած հայտարարությունները կարծես հատուկ նպատակով բնակչությանը խուճապի նախապատրաստելու միտում ունեն: Արսեն Թորոսյանը հայտարարել է, թե չենք կարող համարել, որ կորոնավիրուսի տարածումը կանգնում է կամ 100%-ով մարում է, ուստի պետք է
պատրաստված լինենք վատագույնին թե դեղերով, թե մահճակալային ֆոնդով:
«Առաջ եթե ունենում էինք 50 դեպք մեկ աղբյուրից՝ օրինակ մի մեծ արտադրամասի ևս 50 աշխատող, մենք հիմա ունենում ենք 16, 20, 30 դեպք, բայց 10 տարբեր աղբյուրներից, կամ 20 աղբյուրներից: Հետևաբար, վիրուսի շրջանառությունը որպես այդպիսին դուրս է եկել վերահսկողությունից: Մեր խնդիրն է ամեն հնարավոր դեպքը գտնել և անել նույն գործողությունները, ինչն արել ենք մինչև հիմա: Թեստավորել, մեկուսացնել շրջանակը, բուժել և արդեն առողջացած դուրս թողնել: Այդ գործողությունը պետք է անենք այնքան, քանի դեռ ուժ ունենք: Երբ ազգովի կլինենք ուժասպառ, որոշ գործողություններ արանքից կհանենք, կթողնենք մենակ թեստավորումն ու բուժումը: Մեկուսացում չենք անի, անիմաստ կլինի, քանի որ տարածումը շատ մեծ կլինի»,-հայտարարել է նախարարը և ավելացրել, թե բոլոր սահմանափակող միջոցառումները պետք է դիտարկել հենց այս համատեքստում, և ոչ թե պարզապես թվերի:

Խոսելով Չինաստանից բերված թեստերի մասին, Թորոսյանն ասել է. «Այդ 60 հազար թեստը գնվել է Հայաստանի բյուջետային փողերով, ոչ թե նվեր է: Այս թեստերից ամեն մեկն անելը տևում է 5 ժամ բարձր պատրաստվածությամբ լաբորատորիայում, որից Հայաստանում շատ քիչ կա: Թեստավորումն արվում է ըստ ցուցումների՝ իրական կասկածի դեպքում»:
Ինչ վերեբերում է հարցին՝ ի վերջո պե՞տք է կրել դիմակներ և ձեռնեցներ, թե՞ ոչ, Թորոսյանն ասել է.
«Կարևոր հարց է այն համատեքստում, որ մենք դեռ երկար պիտի ապրենք կորոնավիրուսի հետ: Առողջապահության համաշխարհային կազմակերպությունը խորհուրդ է տալիս կտորից դիմակներ կրել, դրանք ամեն օր լավանալ և կրել: Ցանկալի է կրել դիմակ ինչքան հնարավոր է շատ և տարբեր տեղեր, բայց թե որքան այն կպաշտպանի ձեզ՝ դա կախված է հենց ձեզնից: Եթե համեմատենք, ձեռքերն ավելի հաճախ լվալն է ավելի կարևոր է, քան դիմակ կրելը, ապա միանշանակ՝ ձեռքերը լվանալը, պարզապես ոչ միշտ ունենք նման հնարավորություն: Նույն դիմակը, ըստ նոր ցուցումների, խորհուրդ է տրվում մինչև 8 ժամ, թեպետ բժշկական միջավայրում մենք խորհուրդ ենք տալիս մինչև 4 ժամ, քանի որ այնտեղ պոտանցիալ հիվանդների թիվն ավելի մեծ է: Դիմակ կրելու մասին ես ժամանակին ասել եմ, որ կարիք չկա, բայց իմ նոր խորհուրդներով ասում եմ, որ խորհուրդ է տրվում կրել»,- հայտարարել է Թորոսյանը: Ըստ նրա՝ դիմակ կրելու իմաստն այն է, որ մարդը դիմակի շնորհիվ իր ձեռքը չհպի դեմքին, քթին, աչքին կամ բերանին:
Այստեղ սակայն նախարարի խոսքը դառնում է ինքնահակասող, չէ որ դիմակն ինք էլ որոշակի միջավայրում կարող է դառնալ վիրուսոտ մակերես և վարակը հենց դիմակի միջոցով կարող է փոխանցվել մարդուն: Բացի այդ ՝4 ժամը մեկ դիմակ փոխելը նաև հավելյալ ծախս է. Մեկ դիմակն արժե 200-400 դրամ: Այսինքն մարդն օրվա մեջ միջինը 1000-1600 դրամ էլ պետք է ծախսի դիմակի կամ ձեռնոցի համար: Իսկ ով է կատարելու այդ ծախսը, պարզ չէ:
Բացի այդ՝ եթե նախարարն այլևս եկել է այն համոզման, թե մենք շատ երկար ենք ապրելու կորոնավիրուսի հետ և ինչ-որ պահից սկսած կարող ենք բացի թեստավորումից և բուժումից որևէ այլ քայլ չկատարել և չգնալ մեկուսացումների, հարց է առաջանում, թե ինչու ենք հիմա գնում արտակարգ դրությունը երկարաձգելու հարցին: Եվ ընդհանրապես՝ ի՞նչ է նշանակում պատրաստ լինել վատթարագույնին: Ըստ ամենայնի՝ Արսեն Թորոսյանն ինքնախուճապի է մատնել ինքն իրեն և շատ վտանգավոր կերպով այդ իմպուլսները փոխանցում է հանրությանը: Զգոնության կոչեր, իհարկե պետք են, բայց վատթարագույնին պատրաստվելը, ներողություն, հասարակության բաց նյարդին դիպչելու պես մի բան է:
Ի վերջո, ինչու էր Արսեն Թորոսյանը ԱԺ նիստին առանց դիմակի ու ձեռնոցի եկել, ինչու էին այդ դահլիճում 20 հոգուց ավելի մարդիկ հավաքվել: Ինչով են շինհարապարակով մի քանի մետր հեռավորությամբ աշխատող շինարարներն ավելի վտանգավոր կամ վարակի տարածման ավելի մեծ աղբյուր, քան ԱԺ դահլիճում հավաքված մի քանի տասնյակ առանց դիմակի պատգամավորները:
Նախ ասում էիք՝ սա լուրջ վիրուս չէ,հետո, թե  դիմակ պետք չի կրել ,հիմա ասում եք՝ պետք է հնարավորինս շատ կրել:Կամ հասկացեք ինչ եք անում կամ էլ իզուր տեղը մարդկանց խուճապի մի մատնեք:

Հայկ Դավթյան