Ամենախոցելի վիճակում գտնվողներին սոցիալական աջակցություն չի տրվում

 Արտակարգ իրավիճակի և համավարակի պայմաններում աշխարհի բոլոր պետությունները սոցիալական տարբեր նախաձեռնություններով են հանդես գալիս:

Հայաստանի կառավարությունը հայտարարել է 9 միջոցառման մասին, որոնք նախատեսված են համավարակի սոցիալական հետևանքների չեզոքացմանը: Առաջին հայացքից` 9 միջոցառումը բավականին հնչեղ է: Բայց երբ փորձում ես հասկանալ, թե քանակական առումով կամ տոկոսային հարաբերությամբ որքան մարդ կարող է դրանցից օգտվել, պարզվում է, որ պետությունը շատ քիչ կատեգորիաների է ձեռք մեկնում:

 Ամենալիբերալ և ամենազանգվածային աջակցությունը, որն ընդունվեց կառավարության վերջին նիստում, նախատեսված է այն ընտանիքների համար, որոնք ունեն մինչև 14 տարեկան երեխա և մինչ արտակարգ իրավիճակի հայտարարումը, ինչպես նաև դրանից հետո չեն ունեցել և չունեն գրանցված աշխատանք: Նման ընտանիքներին` յուրաքանչյուր երեխայի համար 26 հազար դրամ աջակցություն է նախատեսվում: Այս ամենազանգվածային աջակցությունից չեն կարող օգտվել միայն սոցիալական անապահովության նպաստների համակարգում ընդգրկված ընտանիքները: Նման կարգավիճակում գտնվող ընտանիքը չի կարող կառավարության մնացած միջոցառումներից որևէ մեկից օգտվել, քանի որ մնացած միջոցառումների շահառու կարող են դառնալ միայն նրանք, ովքեր ունեցել են աշխատանք, որը մարտի 14-25-ի ընթացքում` այսինքն` արտակարգ դրության հայտարարումից հետո կորցրել են այն:

Ստացվում է, որ ամենախոցելի վիճակում գտնվող ընտանիքը, որը չունի աշխատանք, և ամսական ընդամենը 27 հազար դրամ նպաստ է ստանում, համավարակի պայմաններում պետությունից որևէ աջակցություն չի ստանում, հետևաբար մնում է միայնակ` վիրուսի դեմ դիմաց: Կառավարությանը չի հետաքրքրում թե, օրինակ, 2 երեխա ունեվող ընտանիքն ինչպես է ապրելու ստեղծված ճգնաժամի պայմաններում: Թերևս պատկան մարմիններն առաջնորդվել են այն մտայնությամբ, որ գրանցված աշխատանք չունեցող նպաստառու ընտանիքը համավարակի պայմաններում որևէ կերպ չի տուժել. նա չի կորցրել աշխատանք, իսկ նպաստ, ինչպես նախկինում, այնպես էլ համավարկի պայմաններում, կշարունակի ստանալ:

Կառավարության, վարչապետի և սոցապ նախարարի մտքով չի անցել, որ ընտանիքը 27 հազար դրամով և համավարակից առաջ, և, առավել ևս, համավարակի ժամանակ, չի կարող ապրել: Վստահաբար, նման ընտանիքը ունի չգրանցված աշխատանք, որը համավարկի պայմաններում շատ մեծ հավանականությամբ կարող էր կորցնել: Բայց պետությանը դա չի հուզում: Նա իր քաղաքացուն ասում է` գնա ու լուծիր քո խնդիրները` ոնց ուզում ես: Առանց այդ էլ` լավ օրից չէ, որ քաղաքացին աշխատում է չգրանցված, չի օգտվում արձակուրդի և մնացած բոլոր իրավունքներից: Նիկոլ Փաշինյանը հենց այս շերտի իրավունքներն էր ոտնահարում` ասելով, թե Հայաստանում օրավարձով աշխատողներ չկան: Սոցիալական աջակցության չափանիշներն այնպես են ընտրվել, որ դրանից հնարավորինս քիչ մարդիկ օգտվեն:

Հայկ Դավթյան