Հավատարիմ իրավահաջորդ չկար, իսկ դավաճանությունը չէր բացառվում

Ռուսաստանի Սահմանադրական դատարանը շտապ կարգով քննարկում է սահմանադրության փոփոխությունները: Ռուսաստանի Դաշնության նախագահ Վլադիմիր Պուտինը խնդրել է Սահմանադրական դատարանին արտահայտվել, մասնավորապես գործող նախագահի լիազորությունների ժամկետի զրոյացման վերաբերյալ: Այս մասին գրում է Независимая газета պարբերականը:

Tert.am-ը ներկայացրել է հոդվածը, որում նշվում է, թե այլ կերպ ասած՝ սահմանադրական փոփոխություններից հետո Պուտինը ևս երկու անգամ կկարողանա իր թեկնածությունն առաջադրել նախագահ դառնալու համար:

«Սոցիալական մարկետինգի ինստիտուտ» հետազոտական ընկերության կողմից հարցվածների 57%-ը պատասխանել է, որ 2024 թվականին կքվեարկի գործող նախագահի օգտին: Այնուամենայնիվ այստեղ պետք է մի վերապահում անել: Պուտինը ցանկանում է, որ իրավունք ունենա ևս մեկ անգամ թեկնածություն առաջադրել, բայց նա դեռևս չի հայտարարել, որ հստակ օգտվելու է այդ իրավունքից:

Այդ դեպքում ինչի՞ համար է պետք լիազորությունները զրոյացնելու մանևրը: Նախևառաջ Պուտինը դեռևս չի հայտնվել այնպիսի իրավիճակում, երբ նրան իրոք պետք է հեռանալ: 2008 թվականին նա պաշտոնը փոխանցեց Դմիտրի Մեդվեդևին, բայց պահպանեց և՛ վարկանիշը, և՛ վերադառնալու հնարավորությունը: Սահմանադրության առաջարկված փոփոխություններն առանց լիազորությունների ժամկետը զրոյացնելու նրան արդեն վերադառնալու հնարավորություն չեն տալիս և Ռուսաստանի քաղաքական քարտեզի վրա չեն թողնում այնպիսի կետեր, որտեղ կարող է հայտնվել Պուտինը:

Բացի այդ, գործող նախագահը դեռևս չգիտի, թե 2024 թվականի հեռանկարում իրեն ինչպես կպահի էլիտան, այդ թվում՝ ամենահավատարիմ և նվիրված, ստուգված մարդիկ: Ներկայիս, և նույնիսկ բարեփոխված օրենքների պարագայում նա չի կարող երաշխավորել տեսական իրավահաջորդի հավատարմությունն ու բացառել դավաճանությունը: Պուտինն առայժմ չի ցանկանում փորձարկումներ անել:

Հատկանշական է այն, որ առաջարկված «զրոյացումը» բոլոր կողմնակիցների կողմից բնութագրվում է որպես քայլ, ուղղված երկրի կայունության պահպանմանը:
Միևնույն ժամանակ Վլադիմիր Պուտինն իշխանության ղեկին է արդեն 20 տարի: Սահմանադրության ներկայիս արագ խմբագրումը վկայում է համակարգի կողմից կայունությունն ապահովելու անկարողության մասին: Ստացվում է, որ այս տարիներին Ռուսաստանում գործել է միայն մեկ ինստիտուտ` անձնական իշխանությունը, Պուտինի հեղինակությունը:

Ինչևէ, Կրեմլում արդեն իսկ նշել են 2024 թվականի ընտրություններին Պուտինի մասնակցության պայմանները:

Վլադիմիր Պուտինի մասնակցությունը նախագահի ընտրություններին, որոնք նշանակված են 2024 թվականին, կախված կլինի մի քանի գործոններից: Այդ մասին ասել է պետության ղեկավարի մամուլի քարտուղար Դմիտրի Պեսկովը:
Մասնավորապես համաշխարհային տնտեսության վիճակից, կորոնավիրուսի հետևանքներից և տարածաշրջանային հակամարտություններից՝ ճշտել է նա: «Աշխարհում տիրող իրադրությունը լավ հայտնի է, այն շատ ու շատ անհանգիստ է»,- արձանագրել է ռուս պաշտոնյան:

Նրա խոսքով՝ «նման ոչ դյուրին տարիներին որոշ երկրներ որոշումներ են ընդունել գործող նախագահի համար այնուհետև էլ իր ճանապարհին մնալու հնարավորության մասին»: «Այս ոչ դյուրին տարիներին վիթխարի նշանակություն ունի իշխանության կայունությունը, իշխանության հաստատունությունը, իշխանության հետևողականությունը»,- ընդգծել է Պեսկովը: «Ըստ երևույթին դրանով էլ ղեկավարվել է Տերեշկովան, դա եղել է նրա փաստարկումը, որին համաձայնել է նախագահ Պուտինը»:

Մետաքսյա Շալունց