Թուրքիայի ԱԳՆ-ն Գերմանիային կոչ է արել չքաղաքականացնել պատմությունը՝ կապված Հայոց ցեղասպանության հետ

Anadolu լրատվական գործակալության փոխանցմամբ՝ Թուրքիայի ԱԳՆ մամլո քարտուղար Թանժու Բիլգիչը դատապարտել է Հայոց ցեղասպանությունը ճանաչող բանաձևը, որը քննարկվելու է Բունդեսթագում: «Մեզ համար որևէ նշանակություն չունեն երրորդ երկրների խորհրդարանների կողմից պատմությունը քաղաքականացնելու փորձերը, որոնք էլ ավելի են սրում հարցը: Ցեղասպանությունն այն թեման չէ, որը կարող է օգտագործվել որպես քաղաքական գործիք: Անկարան առանց այն էլ առաջարկել է ստեղծել պատմաբանների համատեղ հանձնաժողով՝ այդ հարցի մանրակրկիտ հետազոտման համար: 1915 թվականի դեպքերն ուսումնասիրելու մասին Թուրքիայի առաջարկը շարունակում է մնալ ուժի մեջ: Մենք Գերմանիայի իշխանություններին հայտնել ենք այդ հարցի շուրջ մեր դիրքորոշումը և ափսոսանքով հետևում ենք, որ վերջին տարիներին Բեռլինը հավատարիմ չէ չեզոք քաղաքականությանը: Նման մոտեցումը վիրավորում է թուրքական արմատներով Գերմանիայի քաղաքացիներին և ընդհանրապես թուրք ժողովրդին: Համոզված եմ, որ Գերմանիան կհիշի՝ 2015 թվականի հոկտեմբերի 15-ին ՄԻԵԴ-ը վճիռ է կայացրել «Փերինչեքն ընդդեմ Շվեյցարիայի» հնչեղ գործով: 1915 թվականի դեպքերի վերաբերյալ որոշումը բացասաբար կազդի երկկողմ հարաբերությունների վրա: Մենք Գերմանիայի խորհրդարանին կոչ ենք անում առողջ մտածողության ու դատողության»,- ասել է նա: Հիշեցնենք, որ օրեր առաջ Բունդեսթագի փոխնախագահ, Կանաչների կուսակցության անդամ Կլաուդիա Ռոտը հույս էր հայտնել, որ Բունդեսթագում ներկայացված խորհրդարանական խմբերը ևս մեկ անգամ վիզ չեն ծռի Թուրքիայի առջև և հունիսի 2-ին կընդունեն Հայոց ցեղասպանության ճանաչման մասին բանաձևը: