Վայոց Ձորում հուսալքված վիճակ է․ ոչ մեկը չի հավատում Նիկոլ Փաշինյանի խոսքին․ Տիգրան Եղոյան
Երեկ երեկոյան ՀՀ վարչապետ Նիկոլ Փաշինյանն իր ֆեյսբուքյան էջում գրել էր, որ Հայաստանում հաստատվել է կորոնավիրուսի ևս երեք նոր դեպք,որոնցից երկուսը ՀՀ քաղաքացի են, մեկը՝ Իտալիայի։
Արդեն այսօր մամուլում տեղեկություններ էին հայտնվել, որ վարակվածներից մեկը Էջմիածնի բնակիչ է և այսօր շտապօգնության մի քանի մեքենաներ էին ուղարկվել Էջմիածին, որպեսզի վարակված քաղաքացու հետ շփված մարդկանց մեկուսացնեն։
hayeli.am-ին անմիջապես դիմեց Եղեգնաձորից նախկին ֆերմեր Տիգրան Եղոյանը, ով վերջին տարիներին իր ընտանիքի հետ ապրում է Էջմիածնում։ Ֆերմերի խոսքով՝ քաղաքում խուճապ է, երեխաներին դպրոցներից անմիջապես տուն են ուղարկել․
- Էջմիածինը սարսափելի խուճապահար վիճակում է։Շտապօգնության մեքենաները շրջում են քաղաքում, նույնիսկ դպրոցներում չեղարկվել են դասերը, և երեխաները վախեցած եկել են տուն։ Սթրեսի մթնոլորտում են բոլորը, այդ թվում ընտանիքս։ Այս պահին ես աշխատանքի բերումով Եղեգնաձորում եմ և լուրերով իմացա, որ ՀՀ վարչապետ Նիկոլ Փաշինյանը քարոզարշավի ժամանակ հայտարարում է՝ ամեն ինչ կարգին է, խուճապի մատնվելու կարիք չկա։Այդ մարդը կորցրել է իրեն, նա քարոզարշավով է տարված։ Այս պահին Էջմիածնում հուսալքված վիճակ է։
Հատկանշական է, որ հենց այսօր ՀՀ վարչապետ Նիկոլ Փաշինյանը քարոզարշավի շրջանակում Վայոց Ձորում է և մենք հետաքրքրվեցինք ֆերմերից, թե ինչ տրամադրություն է տիրում մարզում․
- Խորհրդային տարիներից ժառանգել ենք մի կեղտոտ երևույթ, որը վերջին երեսուն տարում նորից շարունակվում է։ Ուրեմն՝ մինչև վարչապետի Վայոց Ձոր գալը ես տեսա, որ տարբեր օբյեկտների մոտ սկսել են ճանապարհները մաքրել,ծաղիկներ տնկում ու նմանատիպ միմոսություններ անում, որպեսզի ցույց տան, որ իրականում մարզում ամեն ինչ կարգին է։ Պնդում եմ՝ մարդկանց նորից հավաքագրում են ու բերում քարոզարշավին։Ես շատ եմ ափսոսում, որ որևիցե բան չի փոխվել։ Դիմում եմ բոլորին՝ մի՛ հավատացեք Նիկոլ Փաշինյանի խոսքին, եթե հանկարծ «Այո»-ն հաղթի, իմացեք՝ Նիկոլ Փաշինյանն ընդունակ է ամեն ինչի։
Ֆերմերն անդրադարձավ նաև «Հանրապետություն» կուսակցության նախագահ Արամ Սարգսյանի ելույթին,ով երեկ հայտարարել էր, որ այս ամենը սկսվել է նախկին իշխանություններից․
-Խոսում ա մի մարդ, ում եղբայրը դրել է նախկինների պարարտացումը, ինքն ու իր եղբայրն են եղել այս ժողովրդի թշվառության հիմնադիրները՝ Սահմանադրությունը կեղծելով ու կեղեքելով։
Ֆերմերի պնդմամբ՝ Վայոց Ձորում հուսալքված վիճակ է և ոչ մեկը չի հավատում Նիկոլ Փաշինյանի ու մյուս իշխանավորների հայտարարություններին։
Հետևեք մեզ Viber-ում
