Արտակ Հովհաննիսյանը բրոնզե մեդալ է նվաճել

Թեհրանում անցկացվող ըմբշամարտի ամենամյա միջազգային խոշոր մրցաշարում, որը նվիրված է Իրանի առաջին ըմբշամարտիկ օլիմպիական չեմպիոն Ղոլամրեզա Թախթիի հիշատակին, Հայաստանի ազատ ոճի ըմբիշները նվաճել են ընդամենը մեկ մեդալ: Ինչպես տեղեկացնում է Հայաստանի ըմբշամարտի ֆեդերացիայի մամուլի ծառայությունը, 61 կգ քաշային Արտակ Հովհաննիսյանը չնայած հանդես է եկել իր համար անսովոր 57 կգ կարգում, սակայն զբաղեցրել է 3-րդ տեղը եւ արժանացել բրոնզե մեդալի: Նա պարգեւատրվել է 2000 ԱՄՆ դոլարով: Մեր մյուս ըմբիշներից համեմատաբար հաջող են հանդես եկել 57 կգ քաշային Հմայակ Աղաջանյանն ու 65 կգ քաշային Արթուր Բաղդասարյանը, որոնք չեն կարողացել հաղթահարել 3-րդ տեղի համար պայքարի վերջին արգելքը եւ բավարարվել են 5-րդ տեղով: Վերջինները ստացել են 1000-ական ԱՄՆ դոլար պարգեւավճար: