Բաղրամյան 1 նոտարական տարածքի բնակելի հատվածի շքամուտքերում տեղադրված են «ԱՅՈ»-ի քարոզչական վահանակներ (լուսանկարներ)
Սահմանադրական փոփոխությունների հանրաքվեի «ՈՉ» քարոզչական կողմի անդամ, իրավաբան Ռոբերտ Հայրապետյանը ֆեյսբուքյան իր էջում հրապարակել է լուսանկարներ, որին կից գրել է, որ Բաղրամյան 1 նոտարական տարածքի բնակելի հատվածի շքամուտքերում տեղադրված են «ԱՅՈ»-ի քարոզչական վահանակներ։ Գրառումն ամբողջությամբ՝ ստորև.
«Դիմում եմ ՀՀ կենտրոնական ընտրական հանձնաժողովին
Բաղրամյան 1 նոտարական տարածքի բնակելի հատվածի շքամուտքերում տեղադրված են քարոզչական այսպիսի վահանակներ։
Քարոզչական պաստառներ կարող են փակցվել միայն օրենքով նախատեսված և թույլատրելի վայրերում, որն ըստ էության չի ներառում մատնաշված տարածքը։
Խնդրում եմ Կենտրոնական ընտրական հանձնաժողովին քայլեր ձեռնարկել այս խախտումները անհապաղ վերացնելու և քարոզչական պաստառներ ներառող վահանակները տեղադրողներին պարզելու ուղղությամբ»:
Վերոնշյալին անդրադարձել է նաև «ՈՉ» քարոզչական կողմի անդամ, «Իրավական ուղի» ՀԿ ղեկավար Ռուբեն Մելիքյանը՝ նշելով, որ հարցն այսօր կկարգավորվի և խախտումը կվերացվի։
«Համենայն դեպս, փաստն այն է, որ Կենտրոնական ընտրական հանձնաժողովը տեղյակ է խնդրին, և ինձ հավաստիացրել են, որ ձեռնարկվում են օրենքով նախատեսված միջոցները՝ ուղղված խախտման վերացմանը»,- իր ֆեյսբուքյան էջում գրել է Մելիքյանը։
Լուսանկարները՝ Ռոբերտ Հայրապետյանի ֆեյսբուքյան էջից:
Հետևեք մեզ Viber-ում
