Ղարաբաղյան «մեր բազարը Մոսկվայի հետ է». Թուրքերի թափանցիկ ու լկտի ուղերձը

Թուրքիայի արտգործնախարար Մևլութ Չավուշօղլուն հանդիպել է ԵԱՀԿ Մինսկի խմբի համանախագահների հետ:

Թուրքիայի արտգործնախարար Մևլութ Չավուշօղլուն մարտի 2-ին Անկարայում ընդունել է ԵԱՀԿ Մինսկի խմբի համանախագահներ Իգոր Պոպովին, Էնդրյու Շոֆերին և ԵԱՀԿ գործող նախագահի անձնական ներկայացուցիչ Անջեյ Կասպրշիկին:

Թվիթերի նրա էջում հրապարակվել է այդ հանդիպմանը նկարը: Սա դեռ քիչ է, թուրք արտգործնախարարը բարձրացրել է ԵԱՀԿ Մինսկի խմբի ղարաբաղյան հակամարտության կարգավորման ուղղությամբ աշխատանքի արդյունավետությունը։
Թուրքիայի արտգործնախարար Մևլութ Չավուշօղլուն կոչ է արել Մինսկի խմբի համանախագահներին ակտիվացնել ղարաբաղյան հակամարտության լուծմանն ուղղված ջանքերը: Թուրքիայի արտգործնախարարը, սակայն, չի հստակեցրել, թե որտեղ է կայացել այդ հանդիպումը: «ԵԱՀԿ Մինսկի խումբը Լեռնային Ղարաբաղի խնդրի լուծման ուղղությամբ պետք է ավելի արդյունավետ գործի: Այդ լուծումը պետք է ամբողջությամբ համապատասխանի Ադրբեջանի ինքնիշխանության, տարածքային ամբողջականության սկզբունքներին և այդ երկրի միջազգայնորեն ճանաչված սահմաններին», - նշել է Մևլութ Չավուշօղլուն:

Նշենք, որ հանդիպման վերաբերյալ մասնակիցները դեռևս որևէ մեկնաբանություն չեն արել:

Հետաքրքրականն այն է, որ Չավուշօղլուի և Մինսկի խմբի համանախագահների հանդիպումն այդպես էլ աննկատ կմնար, եթե դրան չանդրադառնային հայաստանյան սոցցանցում: Թեմայի վերաբերյալ «Ադեկվադ» միաբանության ղեկավար Արթուր Դանիելյանի գրառմանը հաջորդել են տարաբնույթ մեկնաբանություններ ու քննարկումներ, որոնց ընթացքում հարց է ուղղվել նաև ՌԴ ԱԳՆ մամուլի խոսնակ Մարիա Զախարովային, թե ինչպես է գերատեսչությունը վերաբերում այն փաստին, որ Թուրքիայի արտգործնախարարը հանդիպել է ԵԱՀԿ Մինսկի խմբի համանախագահներին:
Մարիա Զախարովան ի պատասխան հաստատել էր, որ խմբի կազմում Ռուսաստանի ներկայացուցիչը մասնակցել է հանդիպմանը: Օգտատերերից մեկի այն հարցին, թե հանդիպումն ինչ կապ ունի Սիրիայում տիրող իրավիճակի էսկալացիայի հետ, Զախարովան պատասխանել է, թե իրեն հայտնի չէ, թե ինչպես է հանդիպումը կապված Սիրիայի հետ: Զախարովան նշել էր, որ ո՛չ Մինսկի խումբը, ո՛չ էլ Ռուսաստանն այս հանդիպումը չեն մեկնաբանել, քանի որ իրենք պարբերաբար նմանատիպ միջոցառումներ են անցկացնում տարբեր երկրների հետ:

Մեկ այլ օգտատեր էլ հարցրել էր, թե արդյո՞ք Ռուսաստանը սատարում է Թուրքիայի հաշվին ԵԱՀԿ Մինսկի խմբի ձևաչափը ընդլայնելու Ադրբեջանի ցանկությունը, չեզոքություն է պահպանում, թե՞ կտրականապես դեմ է գործընթացի նման վերափոխմանը: Զախարովան պատասխանել էր, որ Ռուսաստանը ելնում է առկա ձևաչափի արդիականությունից:

Այսպես, համացանցային տիրույթում Զախարովայից պատասխան կորզելուց հետո միայն պաշտոնական Երևանն էլ արձագանքեց: ՀՀ ԱԳՆ Զոհրաբ Մնացականյանը թվիթերյան իր էջում արձագանքել էր աստվածաշնչյան մեջբերմամբ. «Լեռնային Ղարաբաղի հակամարտության հարցում Մինսկի խմբի համանախագահներին ուղղած Մևլութ Չավուշօղլուի խորհուրդը մտածելու առիթ է տալիս Ղուկասի 4:23-ի շուրջ՝ «Բժի՛շկ, բժշկի՛ր ինքդ քեզ»»,- գրել էր Մնացականյանը:

Այսինքն, Չավուշօղլուն ԵԱՀԿ ՄԽ համանախագահներից պահանջում է ավելի արդյունավետ աշխատել, ցուցում տալիս, որ ԵԱՀԿ Մինսկի խմբի որոշումը պետք է հիմնված լինի Ադրբեջանի տարածքային ամբողջականության, ինքնիշխանության և միջազգայնորեն ճանաչված սահմանները հարգելու շրջանակներում, իսկ մեր երկրի ԱԳ նախարարը որոշում է Աստվածշնչյան հակադարձումով «տեղը դնելու» Թուրքիայի ԱԳ նախարարին:

Նկատենք, որ Թուրքիան առաջին անգամ չէ նման հանդիպում անցկացնում, այստեղ առավել կարևոր է, թե թուրք արտգործնախարարի հնչեցրած հայտարարությունը, մասնավորապես՝ Ադրբեջանի տարածքային ամբողջականության պահպանման պահանջ ներկայացնում, ինչ դիրքորոշում ունեն ԵԱՀԿ Մինսկի խմբի համանախագահող պետությունները:

Պաշտոնական Երևանը դրան պետք է արձագանքեր: Չէ՞ որ միջնորդները պարտավոր են չեզոքություն պաշտպանել:

Մոտավորապես 10 օր առաջ էլ, երբ Թուրքիայի նախագահ Ռեջեփ Թայիփ Էրդողանը մեկօրյա այցով ժամանեց Բաքու, որտեղ մասնակցել էր թուրք-ադրբեջանական ռազմավարական համագործակցության բարձր մակարդակով խորհրդի 8-րդ նիստին, Ալիևի հետ համատեղ ասուլիսում Էրդողանն անդրադարձել էր ղարաբաղյան թեմային. - «Լեռնային Ղարաբաղի հակամարտությունը ոչ միայն Ադրբեջանի, այլև Թուրքիայի խնդիրն է: Մեր գլխավոր նպատակն է հասնել այնպիսի կարգավորման, որը կերաշխավորի Ադրբեջանի ինքնիշխանությունը և տարածքային ամբողջականությունը»:
Այսինքն, պաշտոնական Անկարան հստակ լծվել է Բաքվին ԼՂ հարցում ակտիվ աջակցության քաղաքականության ցուցադրության, դրան զուգահեռ կարծես Մոսկվայի ուշադրությունն է ցանկանում հրավիրել: Այսինքն, ղարաբաղյան «մեր բազարը Մոսկվայի հետ է»՝ սկզբունքով:

Մետաքսյա Շալունց