ՍԴ «հերոսները» գիծը քաշեցին, իսկ դուք գնացեք հանրաքվեին ջուր հասցրեք

Օրերս պարզ դարձավ, որ ՍԴ 7 անդամները չտրվեցին գայթակղությանը՝ ժամկետից շուտ կենսաթոշակի անցնել, բայց շարունակել պահպանել բարձր եկամուտ։
Լրացավ իշխանության ընդունած վաղ կենսաթոշակից օգտվելու գործողության վերջնաժամկետը, ու իշխանությունների հաշվարկը տապալվեց: Ավելորդ է հիշեցնել, թե ամիսներ շարունակ իշխանությունն ինչպիսի արկածախնդրությամբ է ճնշում ՍԴ անցանկալի անդամներին, երբ հասկացավ, որ վախեցող չկա, նշված օրենքն ընդունեց, որը բնորոշվեց շանտաժի, միեւնույն ժամանակ` կաշառքի օրենք:

Իշխանությունը տակից ճնշումներ էր գործադրում ՍԴ 7 դատավորների վրա, որպեսզի համաձայնեն ընդունել այդ <<կաշառքը>> եւ հեռանան ՍԴ-ից, բայց բոլոր ջանքերը ջուրը լցվեցին:  Նրանք չտրվեցին «ժողովրդի» ավելի քան 70 տոկոս աջակցությունը վայելող իշխանության եւ այդ իշխանության գրպանում գործող իրավապահ մարմինների աներևակայելի ճնշմանը: ՍԴ 7 անդամների պահվածքը, եթե չասենք աննախադեպ, առնվազն հազվադեպ հանդիպող երևույթ է հայկական իրականության մեջ։ Մենք սովոր չենք պայքարելու, մենք սիրում ենք հեշտ ապրել, չաշխատել, բայց մեծ եկամուտ ստանալ: Հատկապես ատելության այսպիսի գերդոզավորված մթնոլորտում, ամբոխավարական ժամանակներում, շատերն էին մտածում, որ մարդիկ չեն դիմանա ճնշումներին, շառ ու փորձանքից հեռու կթողնեն ու կհեռանան, բայց հենց այսպիսի իրավիճակներում է երեւում իրական սկզբունքայնությունն ու քաղաքացիությունը:

Եւ այս ամենից հետո մեծ-մեծ խոսող քաղգործիչները էլ ավելի խղճալի են դառնում: Ու ստացվում է՝ ումից չես սպասում, հենց նրանք են դառնում իրական հեղափոխականներ, որոնք մտածողության, արժեհամակարգի մտածողություն են բերում՝ դնելով գիտակից հանրություն կերտելու անկյունաքարը՝ ի հեճուկս պոպուլիստ ամբոխավարների: Այլ ոչ թե վախկոտ ու երկնչող քաղաքական գործիչների, որոնց իներտությունը մի բացատրություն ունի՝ հարվածի տակ չհայտնվելու, դիմակայության առաջին պատը չկազմել: Հիմա այդ պատը կազմված է, պարոնայք, կողմնորոշվեք ձեր անելիքներում: Ի վերջո, պատմությունն ապացուցել է, որ անվախ, սկզբունքային հեղափոխականներն են դառնում ժողովուրդների մեծ առաջնորդներ, այլ ոչ թե հաշվենկատ, իշխանությունից դողացող, իրենց շահը հանրայինից վեր դասողները:

Անի Սահակյան