Ուշագրավ զարգացումներ հայ -ղազախական հարաբերությունների սկանդալում

Պարզվում է, որ ավտոմեքենաների շուկայում, բացի «հասարակ» քաղաքացիներից, մեքենաների առք ու վաճառքում ներգրավված են եղել նաև բարձրաստիճան պաշտոնյաների ծնողներ, մասնավորապես՝ Արդարադատության փոխնախարար Քրիստինե Գրիգորյանի հայրը՝ Աղվան Գրիգորյանը: Նա 2019թ.-ի ողջ ընթացքում ակտիվ զբաղված է եղել մեքենաների ներկրման-արտահանման գործով: Ըստ որոշ տեղեկությունների՝ ծավալները հասել են ամսեկան կտրվածքով մոտ 250 մեքենայի:
Չի բացառվում, որ ղազախների մաքսատուրքը շրջանցելու նպատակով տարատեսակ կացության կարգավիճակներ ձեռք բերելու համար Աղվան Գրիգորյանը օգտվել է իր դստեր՝ բարձրաստիճան պաշտոնյա լինելու հանգամանքից:
Հիշեցնենք, որ Ղազախստանի նախագահ Քասիմ Ժոմարտ Տոկաևը հունվարի 24-ին Կառավարության ընդլայնված նիստի ժամանակ ելույթ ունենալիս նշել է, որ երկրում կան խնդիրներ այն ավտոմեքենաների հետ կապված, որոնք ներկրվել են Եվրասիական տնտեսական միության անդամ պետություններից, որոնք ժամանակին չեն հաշվառվել: Ղազախստանի Հանրապետության նախագահը հանձնարարել է կառավարությանը 1-ամսյա ժամկետում տալ ստեղծված իրավիճակի իրավական գնահատականը: Այդ խնդիրը լուծելու համար Կառավարությունը մեկ ամսվա ընթացքում մեկանգամյա կարգով պետք է ապահովի 2020 թվականի փետրվարի 1-ի դրությամբ ԵԱՏՄ երկրներից անձնական օգտագործման համար Ղազախստանի քաղաքացիների կողմից ավտոմեքենաների ժամանակավոր գրանցումը: Մինչեւ 2021 թվականի մարտի 1-ը ավտոսեփականատերերը պետք է վճարեն մաքսատուրքեր կամ դուրս բերեն մեքենան երկրից, կամ կատարեն օրենքով չարգելված այլ գործողություններ: Իր ելույթի վերջում երկրի նախագահը հանձնարարել է կառավարությանը դադարեցնել ուրիշ երկրներից ավտոմեքենաների անօրինական ներկրումը: