Արմեն Սարգսյանը Փաշինյանի համար ավելի լեգիտիմ է, քան Լեւոն Տեր-Պետրոսյանը

Փետրվարի 6-ին Ազգային ժողովը ընդունեց Սահմանադրության փոփոխությունների նախագիծը հանրաքվեի դնելու մասին որոշումը։ Նախագծով առաջարկվում է, որ մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների պաշտոնավարումը դադարում է: Այլ խոսքով՝ սա
հանրաքվե է, որի միջոցով ՍԴ-ն ազատվելու է Հրայր Թովմասյանից և ևս վեց անդամներից, մնալու են 2015 թվականի Սահմանադրությամբ ընտրված Արման Դիլանյանն ու իշխանությունների սիրելի Վահե Գրիգորյանը: Երեկ հայտնի դարձավ, որ ԱԺ-ն այդ փաստաթուղթն ուղարկել է նախագահ Արմեն Սարգսյանին, ով ունի հնարավորություն որոշումը չստորագրելու, եւ նախագիծը Սահմանադրական դատարան ուղարկելու:

Հիմա բոլորի ուշադրությունը սևեռված է հենց նրա վրա․ որն է լինելու նրա քայլը: Երկու օրվա ընթացքում մի քանի տասնյակ իրավաբաններ կոչով են հանդես եկել նախագահին ուղղված, կետ առ կետ ցույց տալով, որ այս պրոցեսը հակաօրինական ու հակասահմանադրական է ու պետք չէ ստորագրել: Մյուս կողմից՝ ակնհայտ է, որ նախագահի դիրքորոշումն առաջին հերթին քաղաքական է լինելու: Քանզի Արմեն Սսարգսյանը ընտրել է իր տեղը այս պետությունում, դա ամենաանշառ, կարծիք չհայտնելու, ոչինչ չասելու, մեր հաշվին շուրջ տարին շրջագայելու տեղն է, ինչի համար էլ իշխանությունը, ի դեմս Նիկոլ Փաշինյանի, աչք է փակում Սարգսյանի կեղծված փաստաթղթերի վրա, եւ այդ պատմությունը հեղափոխությունից հետո օրակարգ չի բերվում:

Ուստի սովորության համաձայն այս դեպքում էլ Արմեն Սարգսյանն ընտրեց իր կոմֆորտ գոտին: Ճիշտ է նա դեռեւս չի ստորագրել, բայց նախորդ օրվա իր հարցազրույցում գրեթե հստակ ակնարկել էր, որ դեմ չի լինելու, քանզի Սսարգսյանի խոսքով՝ պետք չէ վախենալ հանրաքվեից: << Ես կողմնակից եմ, որ մեր մշակույթում ժողովրդին դիմելը, որպես գործընթաց, ամրանա: Դա ծայրահեղ միջոց չէ>> ասել է նա:

Որ թե Փաշինյանը, թե Արմեն Սարգսյանը սեփական շահը վեր են դասում պետությունից, մենք չէ, որ պետք է ասենք, այդ մասին նրանց մատնում են իրենց իսկ քայլերը: Ասենք ինչ կարգի կյանքի ու մահվան հարց պիտի լինի Փաշինյանի համար գործող ՍԴ կազմից ազատվելու հարցը, որ նա ի նշան երախտագիտության, երեկ այցելել է նախագահի տիկնոջը տեսության, ով վիրահատության է ենթարկվել:
Սա անում է մի մարդ, ով շաբաթներ առաջ հարկ չհամարեց շնորհավորական ուղերձ հղել առաջին նախագահին՝ ծննդյան օրվա կապակցությամբ: Եթե նույնիսկ նա հոգեւոր հայր չէ, ապա նորանկախ Հայաստանի հիմնադիր նախագահն է, եւ ինստիտուտների ու պետության նկատմամբ հարգանքից ելնելով ուղղակի պարտադիր էր այդ շնորհավորանքը:Ստացվում է իր ոչ լեգիտիմ ներկայով Արմեն Սսարգսյանն ավելի մեծ լեգիտիմություն ունի Փաշինյանի համար, քան Լեւոն Տեր-Պետրոսյանը:

Անի Սահակայն