Թուրքիայի վարչապետի հրաժարականը սպառնալիք է

Թուրքիայի վարչապետ Ահմեթ Դավութօղլուի հրաժարականը հարցականի տակ է դնում Բրյուսելի ու Անկարայի միջև միգրացիոն համաձայնագրի իրագործումը, գրում է The Financial Times-ը։ Ինչպես նշում է պարբերականը, համաձայն գործարքի՝ անօրինական ներգաղթյալներն ու փախստականները, որոնք մինչև հունական կղզիներ էին հասել, ավտոմատ կվերադառնան Թուրքիա, իսկ Եվրամիությունը, ի պատասխան, թուրք քաղաքացիների համար չեղարկելու էր վիզային ռեժիմը։ Որպեսզի գործընթացը չընդհատվի, Թուրքիան պետք է զբաղվի հակաահաբեկչական օրենսդրությամբ ու վերանայի վերաբերմունքը քաղաքացիական իրավունքների հարցում, գրում է պարբերականը։ ԵՄ-ն զգուշանում է, որ Դավութօղլուի հեռանալուց հետո Անկարան չի զբաղվի խոստացված բարեփոխումներով։ Պարբերականի դիվանագիտական աղբյուրները կարծում են, որ Գերմանիայի կանցլեր Անգելա Մերկելը հույս ուներ, որ «Դավութօղլուի գլխավորած եվրոպամետ կուսակցության դիրքերը կամրապնդվեն»։ Սակայն գործարքի արդյունքում զգալիորեն թուլացան Եվրոպայի հետ մերձեցման կողմնակիցների դիրքերը։ Թուրք պաշտոնատար դեմքերը FT-ին հաղորդել են, որ Թուրքիայի նախագահ Ռեջեփ Թայիփ Էրդողանը ոչ մեծ ուրախությամբ էր հետևում, թե ինչպես է վարչապետը Մերկելին և այլ պաշտոնատար անձանց երկու շաբաթ առաջ ցույց տալիս փախստականների համար ճամբարը։ Էրդողանը Դավութօղլուի՝ ԵՄ-ի հետ մերձեցման մեջ սպառնալիք տեսավ, մտածեց, որ նա փորձում է իր տեղը զբաղեցնել միջազգային հարթակում։ Դա հանգեցրեց գործիչների հարաբերությունների բորբոքմանը, որին հաջորդեց վարչապետի հրաժարականը, գրում է թերթը։