ԵԽԽՎ-ում ասֆալտին փռողներն իրենք ծեփվեցին պատերին
Հայաստանում ներքաղաքական գերզգայուն մթնոլորտից վերացած խորհրդարանական ընդդիմությունն ի դեմս Նաիրա Զոհրաբյանի եւ Էդմոն Մարուքյանի մի ողջ շաբաթ թմբկահարում են ԵԽԽՎ-ում Ադրբեջանի դեմ իրենց տարած ջախջախիչ հաղթանակներով, Ադրբեջանին ասֆալտին փռելու իրենց համարձակությամբ.«Ադրբեջանին փռեցին ասֆալտին» խորագրի ներքո ընդամենը ժամեր առաջ ԲՀԿ-ական Նաիրա Զոհրաբյանը պատմեց. «Ստրասբուրգում քննարկեցինք Ադրբեջանում քաղաքական բանտարկյալների թեմայով զեկույցն ու մեր հարեւան երկրին ԵԽԽՎ-ում փռեցին ասֆալտին։
Ադրբեջանցի Սամեդը մի լալահառաչ շոու կազմակերպեց, թե ինչ իրավունքով են հայ պատգամավորները ընդհանրապես խոսում եւ ո՞վ է Եվրոպայի խորհուրդը, որ քննարկի Ադրբեջանին։ Շոուն, սակայն, փառահեղորեն տապալվեց, Ադրբեջանին ուղղակիորեն փռեցին ասֆալտին, ծեփեցին պատերին՝ հիշելով խավիարից մինչեւ ադրբեջանական կոռուպցիոն լվացքատուն, վերջում էլ ձայների առավելագույն մեծամասնությամբ ընդունելով քաղբանտարկյալների մասով բանաձեւը։
Առաջին անգամ վերջին շատ երկար տարիների ընթացքում Ադրբեջանին չհաջողվեց տապալել քաղաքական բանտարկյալների թեմայով զեկույցը։ Ադրբեջանական խավիարը, գոնե այս պահին, Եվրոպայի խորհրդում դադարել է գործոն լինելուց։
Եւ դա փաստ է»:
Այս ռազմահայրենասիրական փոռթկումից բառացիորեն ժամեր անց, երբ մերոնք Ադրփեջան էին ծեփում պատերին, փռում ասֆալտին, ԵԽԽՎ-ն ինքը նույն գործողությունն արեց, բայց արդեն ՀՀ իշխանությունների նկատմամբ: ԵԽԽՎ-ից Հայաստանի վարչապետին ցույց տվեցին հերթական դեղին քարտը: Եվրոպայի խորհրդի խորհրդարանական վեհաժողովի Մոնիթորինգի հանձնաժողովի Հայաստանի հարցերով համազեկուցողներն անհանգստություն են հայտնել Հայաստանում կառավարության և Սահմանադրական դատարանի միջև առկա լարվածության կապակցությամբ: Այս մասին ասվում է ԵԽԽՎ պաշտոնական կայքում հրապարակված՝ Հայաստանում ՍԴ-ի շուրջ ստեղծված իրավիճակի վերաբերյալ մեկնաբանության մեջ:
«Մենք շատ անհանգստացած ենք Հայաստանի երկու պետական ինստիտուտների՝ Վարչապետի աշխատակազմի և Սահմանադրական դատարանի նախագահի միջև լարվածության բարձր մակարդակից։ Վերահսկողությունն ու փոխզսպումը անհրաժեշտ են ցանկացած ժողովրդավարական համակարգում։ Սա ենթադրում է, որ բոլոր ինստիտուցիոնալ լիազորությունները պետք է գործեն ըստ օրենքի գերակայության և հարգվեն գործով և բառերով, ներառյալ անմեղության կանխավարկածի սկզբունքի նկատմամբ: Եթե նրանք չեն կարող համագործակցել այս սկզբունքների համաձայն, ապա դրանք քայքայում և վնասում են միմյանց: Հետևաբար, մենք անհանգստացած ենք այն երկարաժամկետ վնասով, որը կարող է բերել դատական համակարգին այն լարվածությունը, որը հասել է աննախադեպ մակարդակի»,- ասվում է հայտարարության մեջ, որը հրապարակված է ԵԽԽՎ պաշտոնական կայքում։
«Ավելին, իշխանությունները Վենետիկի հանձնաժողովի կարծիքն են հայցել Սահմանադրական դատարանի դատավորների վաղաժամկետ թոշակի մեխանիզմի վերաբերյալ: Համաձայն եվրոպական ստանդարտների՝ Վենետիկի հանձնաժողովն ընդգծել է, որ վաղաժամկետ կենսաթոշակը պետք է լինի խիստ կամավոր և պետք է հարգվի այդ սկզբունքը: Որպես համազեկուցողներ, մենք ուշադիր հետևելու ենք, որ ՀՀ իշխանությունները շարունակեն գործել այս սկզբունքին համապատասխան, նույնիսկ եթե իրականում թվում է, որ այս մեխանիզմի նպատակը, որը 2015 թ. Սահմանադրության փոփոխությունների ոգու ապահովումն է, համարվում է ճիշտ»,-նշել են համազեկուցողները:
ԵԽԽՎ համազեկուցողները նաև հայտարարել են, որ անհրաժեշտ է ձեռնպահ մնալ գործողություններից և հայտարարություններից, որոնք կարող են ընկալվել որպես դատական համակարգի վրա ճնշման գործադրում:
«Բացի այդ, մենք կոչ ենք անում բոլոր կողմերին նվազեցնել լարվածությունը: Ի վերջո, այս լարվածությունը չպետք է ստվերի Հայաստանում բարեփոխումների անհրաժեշտությունը, լինեն դրանք նախապատրաստվող, կամ արդեն սկսված, որոնք հետաքրքրություն են ներկայացնում Եվրոպայի Խորհրդի համար»,-ասված է հայտարարության մեջ:
Սահմանադրական դատարանի նախագահ Հրայր Թովմասյանի նկատմամբ իշխանությունների վերջին օրերի պահվածքը, բնականաբար չէր կարող անարձագանք մնալ: Երբ Նիկոլ Փաշինյանը ֆեյսբուքյան գրառում արեց, որ Հրայր Թովմասյանը չպետք է լինի ՍԴ-ում, նախօրեին էլ մի ոչ լրագրողական, միակողմանի ռեպորտաժ էին պատրաստել Հ1-ով՝ Հրայր Թովմասյանի դեմ, սրան գումարած օրենսդրական նախաձեռնությունները: Աբսուրդն այն է, որ իշխանության ներկայացուցիչներն այս հայտարարության իրենց ձեռնտու հատվածներն են թարգմանած տարածում իրենց էջերին՝ աչք փակելով իշխանություններին ուղղված զգուշացումների վրա:
Հետևեք մեզ Viber-ում
