Փաշինյանից ու Ալիևից պահանջում են լռել. Ինչ ունեն նրանք թաքցնելու

Երեկ ավարտվեց Հայաստանի և Ադրբեջանի արտգործնախարարներ Զոհրաբ Մնացականյանի և Էլմար Մամեդյարովի երկօրյա հանդիպումը Ժնևում, որը շուրջ 11 ժամ է տևել: Հայաստանի արտգործնախարարությունը հայտարարություն տարածեց Հայաստանի և Ադրբեջանի ԱԳ նախարարների հանդիպման վերաբերյալ։

Հաղորդագրությունում նշված է, որ քննարկումների ընթացքում անդրադարձ է կատարվել Լեռնային Ղարաբաղի հիմնախնդրի խաղաղ կարգավորման գործընթացին առնչվող հարցերի լայն շրջանակի. 2019 թվականին ձեռք բերված պայմանավորվածությունների և քննարկված առաջարկների իրականացումը և ժողովուրդներին խաղաղության նախապատրաստելու ուղղությամբ հնարավոր հաջորդ քայլերը, ապագա կարգավորման հիմքը հանդիսացող սկզբունքները և տարրերը։ «Քննարկվել են նաև կարգավորման գործընթացի առաջմղմանն ուղղված ժամանակացույցը և օրակարգը: Նախարար Մնացականյանը շեշտել է խաղաղ գործընթացում Արցախի ժողովրդի ընտրյալ ներկայացուցիչների ներգրավման անհրաժեշտությունը»։

Արտգործնախարարությունը հայտնում էր նաև, որ ԱԳ նախարարները համաձայնել են կրկին հանդիպել մոտ ապագայում՝ ԵԱՀԿ Մինսկի խմբի համանախագահների հովանու ներքո:

Բանակցությունների մասնակցած կողմերը նաև համատեղ հայտարարությամբ են հանդես եկել։ Մինսկի խմբի համանախագահները վերահաստատել են իրենց լիակատար հանձնառությունը՝ օգնել կողմերին՝ գտնել խնդրի խաղաղ կարգավորումը և կարգավորման գործընթացում պահպանել գաղտնիության սկզբունքը, ինչպես նաև շեշտել են երկարատև և արդար խաղաղության հասնելու գործում ստեղծարարությունը և փոխզիջումների ոգու անհրաժեշտությունը: Համանախագահները հայկական կողմի հայտարարությունում տեղ գտած՝ Արցախի ժողովրդի ընտրյալ ներկայացուցիչների ներգրավման անհրաժեշտության մասին ոչինչ չեն հիշատակել:

Ստացվում է, որ միջնորդները պահանջում են կողմերից չբացահայտել բանակցությունների ընթացքը: Հիշեցնենք, որ Ադրբեջանի արտգործնախարարն էր դեկտեմբերին որոշ բացահայտումներ արել: Հայկական կողմն էլ հերքել էր:
Այսինքն, միջնորդները անհանգստացած են, որ որոշ գաղտնի դրվագներ դուր չեն գա կողմերին, այդ իսկ պատճառով փորձում են լռեցնել բանակցողներին:

Որևէ խոսք չկա՝ բանակցություններում Արցախի մասնակցության վերաբերյալ, ինչի մասին պնդում է հայկական կողմը: Եթե հայկական կողմը այդ հարցը բարձրացնում է, սակայն այն չի ընդունվում՝ դա այլ հարց է:

Կարող ենք արձանագրել, որ եթե միջնորդները պահանջում են գաղտնիություն՝ ուրեմն ընթանում կոնկրետ և առարկայական բանակցություններ, թեև Հայաստանի իշխանությունները համառորեն շարունակ պնդում էին, թե որևէ փաստաթուղթ չի քննարկվում:

Մետաքսյա Շալունց