Արփինե Հովհաննիսյանին Սահմանադրական բարեփոխումների հանձնաժողովում չընդգրկելը քաղաքական որոշում է եղել. Ռուստամ Բադասյան

Արդարադատության նախարար Ռուստամ Բադասյանի խոսքով՝ սահմանադրական բարեփոխումների համար նախատեսված հանձնաժողովն իրականում դեռ չի ձևավորվել։

Ինչպես տեղեկացրեց` իրենք միտում ունեն հանձնաժողովում ընդգրկել իրավաբան-գիտնականներ և քաղաքացիական հասարակության երկու ներկայացուցիչներ:

Անդրադառնալով Արդարադատության նախկին նախարար Արփինե Հովհաննիսյանի դիմումին, որը ներկայացրել էր հանձնաժողովում ընդգրկվելու համար, Ռուստամ Բադասյանը նշեց, որ գնահատում են նրա անկեղծ մղումները։

«Մենք մեր այս քայլով չենք ուզում ցույց տալ, որ մենք իր օգնության կարիքը չունենք կամ ունենք, դրա մասին չէ խոսքը։ Ուղղակի տիկին Հովհաննիսյանի դիմումում նշված է, որ նա մասնակցել է նախորդ սահմանադրական բարեփոխությունների հանձնաժողովի աշխատանքներին։ Իրականում խոսքը գնում է ոչ ֆորմալ մասնակցության մասին, քանի որ նայել ենք, նա ֆորմալ առումով հանձնաժողովի անդամ չի եղել։ Մեր սկզբունքը հետևյալն է, որ դատաիրավական բարեփոխումների պաշտոնական փաստաթղթի ռազմավարության մեջ նշվում է, որ քննադատություններ են հնչում 2015 թվականի սահմանադրական բարեփոխումների և այդ քննադատությունների հետ կապված։ Բնականաբար, մենք այդ ամենը չէինք կարող դրական առումով գնահատել։ Այո, սա քաղաքական որոշում է եղել, իսկ այստեղ ի՞նչ կա զարմանալու»,- ասաց նախարարը` հավելելով նաև, որ հանձնաժողովի կազմում ընդգրկվելու համար դիմում ներկայացրած անձանց շրջանում այլ ավելի արժանի անձինք կային, պարզապես պետք է ընտրեին ընդամենը 6 իրավաբան-գիտնականի։