Նիկոլ Փաշինյանը «կացինը» տվել է Տիգրան Հակոբյանին
Հեռուստատեսության և ռադիոյի հանձնաժողովի նախագահ Տիգրան Հակոբյանը հրավիրված ասուլիսում հայտարարել է, որ կան օրենսդրական մի շարք բացեր, որոնք հանգեցնում են տեղեկատվական մանիպուլյացիայի:
«Շատ է խոսվում ատելության խոսքի տարածման մասին: Ինչպես մենք դա կարգավորենք, եթե ատելության խոսքի հասկացության իրավական ձևակերպումը չունենք: Քանի որ չկա կարգավորումը, հետևաբար դա մանիպուլյացիայի հնարավորություն է տալիս: Վիրավորանք, զրպարտություն պարունակող խոսքը դիտարկվում է որպես ատելության խոսք»,- նշել է Տիգրան Հակոբյանը: Նրա խոսքով` ամբողջ աշխարհում տեղեկատվական հոսքերը ինչ-որ ձևով կարգավորում են, որպեսզի նվազեցվեն չարությունը, մանիպուլյացիաները:
Եթե փորձենք պատասխանել այն հարցին, թե ինչ է տվել Տիգրան Հակոբյանի գլխավորած հանձնաժողովը հեռուստաընկերությունների աշխատանքի բարելավմանը, ապա պետք է արձանագրենք` ոչ մի դրական բան: Ատելության խոսքի իրավական սահմանումը, փաստորեն չկա, դրա համար էլ հանձնաժաղովն այստեղ անզոր է: « Իյա, իրո՞ք»-, կասեր դասականը: Օրենքով հստակ սահմանվում է անաչառությունը, նյութի, հաղորդման բովանդակությունում հավասարակշռության պահպանումը, եթերում տարբեր կողմերի` իշխանության թևերի ու քաղաքական բևեռների քարոզչության հավասարակշռության ապահովումը, եթերային ժամանակի համաչափ հատկացնումը:
Տիգրան Հակոբյանն ու նրա գլխավորած հանձնաժողովը երբևէ դիտարկե՞լ են, թե օրինակ Հանրային հեռուստաընկերության եթերում որքան ժամանակ է հատկացվում գործադիր իշխանության և կոնկրետ վարչապետ Նիկոլ Փաշինյանի քաոզչությանը և որքան` դատական իշխանությանը և կոնկրետ ՍԴ դատավորներին ու նախագահին: Վերջին թարմ օրինակը` ՍԴ նախագահ Հրայր Թովմասյանի հասցեին վարչապետի ասուլիսի ժամանակ հնչեցված բացասական գնահատականն ու գրչի հանրահայտ պատմությանն առնչվող Փաշինյանի բոլոր գրառումները գրեթե ամբողջությամբ եթեր են հեռարձակվել: Մինչդեռ ՍԴ նախագահի պատասխան հայտարարությունից մեջբերվել է ընդամենը երկու հակիրճ նախադասություն: Այս հարցով Փաշինյանին հատկացված ժամանակը բազմապատիկ անգամ ավելի շատ է եղել: Հանրային հեռուստաընկերության լրատվական ծրագրով եթեր է հեռարձակվել ռեպորտաժ` ՍԴ նախագահի` ընդդեմ վարչապետի դատական հայց ներկայացնելու վերաբերյալ, որտեղ հնչել են հեգնական գնահատականներ ՍԴ նախագահի հասցեին, որը լրատվական չեզոքության կոպիտ խախտում է և ընդգծված հակաքարոզչություն երկրի ամենաբարձր դատական ատյանի նախագահի հասցեին:
Ընդհանրապես, Հանրային հեռուստաընկերությունը վերջին մեկ տարվա ընթացքում որևէ անգամ հարցազրույցի չի հրավիրել ՍԴ նախագահին, ՍԴ դատավորներին / բացառությամբ ՍԴ դատավոր Վահե Գրիգորյանի/ : Սա այն դեպքում, երբ վարչապետը, քաղաքական ուժերը գիշեր-ցերեկ խոսում են դատական համակարգի բարեփոխումների և Սահմանադրական դատարանի դատավորներին վաղաժամ թոշակի ուղարկելու մասին: Հանրայինը պարտավոր էր ՍԴ բոլոր դատավորներին մեկ առ մեկ հրավիրել հարցազրույցի և հարցնել, թե նրանք ինչ են մտածում իրենց առաջարկվող վաղաժամ թոշակի անցնելու օրենքի մասին: Նման բան չի արվել: Այս ակնհայտ խայտառակություններն արձանագրելը, բարձրաձայնելն ու միջոցներ ձեռնարկելը Տիգրան Հակոբյանի ու նրա գլխավորած հանձնաժողովի սուրբ պարտականությունն է:
Հանրային հեռուստաընկերությունը կառավարության և վարչապետի սեփականությունը չէ և պարտավոր է հավասարաչափ լուսաբանել դատական, օրենսդիր և գործադիր իշխանությունների գործունությունը:
Տիգրան Հակոբյանը նաև հպարտությամբ նշել է, թե մոտ 6 մլն դրամի տուգանքներ են կիրառել տարբեր հեռուստաընկերությունների նկատմամբ: Տուգանքների մասին խոսելուց առաջ նա պետք է հիշի, որ իր խնդիրն ամենևին էլ ընդդիմադիր հեռուստաընկերություններին ասֆալտին փռելը չէ, վերահսկողական գործառույթ ասվածն էլ կացին չէ, որով ում ուզեն` գլխատեն: Հեռուստատեսության և ռադիոյի հանձնաժողովը պարտավոր է ապահովել, որ պետական բոլոր պաշտոնյաները հավասար վերաբերմունք ցուցաբերեն բոլոր հեռուստաընկերությունների նկատմամբ և ոչ թե հյուրընկալվեն միայն իրենց սիրելի ռադիոկայանի ու Հանրայինի եթերներում: Տիգրան Հակոբյանի արդարացումները, թե այդ հարցի հետ կապված գրավոր բողոք չեն ստացել, իսկապես զվարճալի են, որովհետև այդ մասին լրատվամիջոցների ղեկավարները հանրային հարթակներում բազմիցս են խոսել:
Այս և մի շարք այլ իմաստներով` Հեռուստատեսության և ռադիոյի հանձնաժողովը թերացել է և չի կատարել իր բուն գործառույթը: Իսկ Տիգրան Հակոբյանի կյանքում շատ բան չի փոխվել` եթե հեղափոխությունը չլիներ, թերևս նա նույն ջանասիրությամբ ապահովելու էր Սերժ Սարգսյանի անխափան հեռուստաքարոզչությունը: Հիմա նույն բանն անում է Նիկոլ Փաշինյանի համար: Միակ խնդիրը, որին այժմ փորձում է հասնել նա` ոչ իշխանական հեռուստաընկերություններին չեզոքացնելն է:
Հայկ Դավթյան
Հետևեք մեզ Viber-ում
