Մոդեստ Կոլերովը՝ Մեդվեդևի և Ռոգոզինի «անթույլատրելի, ժամանակավրեպ և վնասակար» հայտարարությունների մասին

  Հայաստանն այսօր դիվանագիտական լավ շրջանի մեջ է, և եթե Երևանը մինչ օրս դեռ չի ճանաչել Ղարաբաղի անկախությունը, գոնե պետք է հնարավորինս երկար պահի այս դիվանագիտական դադարը: Այս մասին այսօր «Ազատությանը» տված հարցազրույցում կարծիք հայտնեց ռուսաստանցի փորձագետ, «Ռեգնում» գործակալության ղեկավար Մոդեստ Կոլերովը: Կլերովի խոսքով, եթե դատելու լինենք Ղարաբաղի վերաբերյալ ռուսաստանյան մամուլում հայտնվող վերջին հրապարակումներից, ռուսաստանյան բարձրաստիճան պաշտոնյաների հայտարարություններից և ռուսաստանցի փորձագետների մեկնաբանություններից, տպավորություն է ստեղծվում, որ Ռուսաստանի քաղաքական էլիտան Ղարաբաղի հարցում միասնական մոտեցում չունի: Փորձագետի կարծիքով, հայաստանյան հասարակությունում այսօր առկա հակառուսական տրամադրությունների հիմքում Մեդվեդևի և Ռոգոզինի «անթույլատրելի, ժամանակավրեպ և վնասակար» հայտարարություններն էին: «Այդ հայատարությունները լուրջ վնաս են հասցրել Ռուսաստանի դիրքերին Ղարաբաղում և Հայստանում», - ասում է Կոլերովը և որոշ փակագծեր բացում. - «Մոսկվայում կա երկու տարբեր մոտեցում ղարաբաղյան խնդրին. Սպիտակ տան` այսինքն Ռուսաստանի կառավարության մոտեցումը, և Կրեմլի մոտեցումը: Կառավարության մոտեցման մասին մենք արդեն գիտենք և վաղուց հայտնի է Մեդվեդևի թիմի ադրբեջանամետ դիրքորոշումը: Սակայն կա նաև Կրեմլի, կամ, այսպես ասած, պուտինյան թիմի մոտեցումը և միայն Կրեմլի դիրքորոշումն է, որ կարող է երաշխավորել հայերի համար կարգավորման արդար տարբերակ»: Ընդ որում, ռուսաստանցի փորձագետը վստահ է` Մոսկվան այսօր որևէ նոր ծրագիր չունի, և բացի այդ` Միացյալ Նահանգների և Ռուսաստանի մոտեցումները Ղարաբաղի հարցում այսօր միասնական են: Ավելին, ըստ նրա, և՛ Մոսկվան, և՛ Վաշինգտոնը համարում են, որ ժամանակն է, որ Ստեփանակերտը նորից հանդես գա որպես բանակցային կողմ: Կոլերովը նաև ասում է, որ զարմացած է, որ մինչ օրս Հայաստանի իշխանությունները չեն ճանաչել Ղարաբաղի անկախությունը: «Հարձակվելով` Բաքուն Երևանին Ղարաբաղը ճանաչելու քարտ բլանշ է տվել», - ասում է փորձագետը: Վաղ, թե ուշ` բոլորն էլ ճանաչելու են Ղարաբաղի անկախությունը և Ղարաբաղի կարգավիճակը, որպես բանակցային կողմ, միայն կօգնի այդ գործընթացին, ասում է Կոլերովը` շարունակելով. - «Ղարաբաղը դառնալու է բանակցային կողմ, Ադրբեջանը ստիպված է լինելու հաշտվել այս իրողության հետ, հետո, իհարկե, կլինեն խաղաղապահներ: Սա է միակ տարբերակը»: Ի դեպ, թեև Կոլերովը չի բացառում Բաքվի կողմից նոր հարձակումը, բայց և քիչ հավանական է համարում: