Ի՞նչ կլինի, եթե մինչև նշված ժամկետը ՍԴ դատավորները դիմում չտան
«Ժողովուրդ» օրաթերթը գրում է. «Ինչպես հայտնի է, ՀՀ նախագահ Արմեն Սարգսյանը 2019 թվականի դեկտեմբերի 26-ին ստորագրել է Սահմանադրական դատարանի դատավորների վաղ կենսաթոշակային համակարգի ներդրման օրենսդրական փաթեթը: Եվ ՍԴ դատավորներն այս օրենքի ընդունումից հետո երկու ամիս ժամանակ ունեն դիմում գրելու եւ գնալու վաղ կենսաթոշակի:
Սակայն հունվարի 20-ի դրությամբ ոչ մի դատավոր այդպիսի դիմում չի ներկայացրել: Ավելին, «Ժողովուրդ» օրաթերթի տեղեկություններով՝ դատավորներից ոչ ոք այդպիսի մտադրություն չի ունեցել եւ այժմ էլ չունի: Այսինքն՝մինչեւ այս ամսվա վերջ ոչ մի դիմում չի լինելու:
Ինչպես հայտնի է, եթե օրենքն ուժի մեջ մտնելուց հետո՝ երկամսյա ժամկետում, Սահմանադրական դատարանի դատավորները, այդ թվում՝ ՍԴ նախագահ Հրայր Թովմասյանը, հրաժարական տան, ապա մինչեւ իրենց պաշտոնավարման ժամկետի լրանալը կստանան իրենց աշխատավարձի չափով կենսաթոշակ:
Երեկ «Ժողովուրդ» օրաթերթը ԱԺ պետաիրավական հանձնաժողովի նախագահ Վլադիմիր Վարդանյանից հետաքրքրվեց՝ ինչ կլինի, եթե մինչեւ այդ ժամկետը ոչ մի դիմում չլինի: «Այն կհամարվի իրացված դրույթ եւ այլեւս չի կիրառվի: Օրենքը կդադարի գործել»,- նշեց նա:
Այսինքն՝ հերթական անգամ կարող ենք արձանագրել, որ ՍԴ դատավորներին, եւ հատկապես՝ Հրայր Թովմասյանին տուն ուղարկելու ցանկությունն ու ծրագիրը չիրագործվեց»:
Ամբողջությամբ կարող եք կարդալ թերթի այսօրվա համարում:
Հետևեք մեզ Viber-ում
