Նիկոլ Փաշինյանի խայտառակ խոստովանությունը

Երկու օր է Լուսավոր Հայաստանի ու իշխանականների միջեւ փոխհրաձգություն է Երեւանի քաղաքապետարանին նվիրաբերած աղբատարների՝ «կամազների» հարցով ստեղծված քննիչ հանձնաժողովի կազմը հաստատելու հարցում։ ԼՀԿ-ն դեռ անցած տարի հանդես եկավ քննիչ հանձնաժողով ստեղծելու նախաձեռնությամբ, հավաքեց պահանջվող թվով ստորագրություն եւ իրավունքի ուժով ստեղծվեց հանձնաժողով։ Դեկտեմբերի 5-ին ԱԺ նախագահ Արարատ Միրզոյանը հայտարարեց, որ հանձնաժողովը ստեղծվել է։ Այսօր հրաժարվեց հաստատել հանձնաժողովի կազմը՝ հիմնավորալով, որ գործընթացը հակասահմանադրական է, ԱԺ-ն չունի իրավասություն քննելու ՏԻՄ-ին վերաբերող հարցեր։

Մասնավորապես, Վլադիմիր Վարդանյանը նշեց, որ այս կերպ հանձնաժողովը մխրճվելու է ՏԻՄ դաշտ ու նախաձեռնող ԼՀԿ-ական Անի Սամսոնյանին հարցրեց, թե արդյոք ԱԺ իրավասության մեջ են մտնում հանձնաժողովի բարձրացրած հարցերը։
«Այս հանձնաժողովի համար տրվել է եզրակացություն այս ինստիտուտի փորձագիտական-իրավաբանական վարչության կողմից և ասվում է, որ այս հանձնաժողովը համապատասխանում է ՀՀ Սահմանադրությանը, սա նաև ենթադրում է, որ այս հանձնաժողովի տիրույթում տեղ գտած հարցերի շրջանակն ու դրանց քննարկումը ևս համապատասխանում է ՀՀ Սահմանադրությանը ու մենք բարձրացնում ենք մի հարց, որը կարող է քննարկել օրենսդիր մարմինը։ ՀՀ-ում ՏԻՄ մարմինները բացարձակ անկախ չեն և նաև ՀՀ Սահմանադրությամբ է ամրագրված, որ պետական լիազորված մարմինները ՏԻՄ մարմինների նկատմամբ ունեն իրավական և մասնագիտական վերահսկողության իրավունք»,-պատասխանելով Վարդանյանի հարցին, ասաց Սամսոնյանը։

Արուսյակ Ջուլհակյանն էլ խնդրեց հստակ նշել, թե ԱԺ ո՞ր իրավասության շրջանակներում է առաջարկվել ստեղծել քննիչ հանձնաժողովը, Սամսոնյանն էլ ասաց. «Ես նորից պետք է Ձեզ համար ընթերցեմ  եզրակացությունը, որովհետև այն ընդունվել է այս ինստիտուտի կողմից, որի գլուխը Արարատ Միրզոյանն է, եթե Դուք ունեք որևէ խնդիրներ կամ կասկածներ այս քննիչ հանձնաժողովի իրավասության, օրինականության վերաբերյալ, ուրեմն պետք է դիմեք պարոն Միրզոյանին։
Բայց եթե պարոն Միրզոյանն ընդունել է այդ որոշումը և կա ԱԺ որոշում, որ դա ԱԺ իրավասությունների տիրույթում է և կարող է քննվել, ուրեմն այստեղ հարց է ծագում, որ կամ ձեր ԱԺ նախագահին չեք վստահում, կամ փորձում եք քննիչ հանձնաժողովի օրինականությունը վարկաբեկել։ Որ մե՞կն է»։

Երկու օր շարունակ ԼՀԿ-ականները չէին հասկանում՝ ինչպես էին ի սկզբանե Իմ Քայլում ընդունել որոշումը, հետո բացահայտել, որ այն խնդիր ունի սահմանադրության հետ։ Իմ Քայլը չքվեարկեց ու չհաստատեց հանձնաժողովի կազմը, ինչը նշանակում է, որ այն չի գործի, քանի որ հանձնաժողովում մեծամասնություն էին կազմելու իշխանության պատգամավորները։

Այսօր կառավարության հետ հարցուպատասխանի ժամանակ վարչապետ Նիկոլ Փաշինյանը լույս սփռեց երկօրյա քննարկումների վրա ու տեղեկացրեց, որ այո, իրավունքի ուժով թեպետ ձեւավորվել է հանձնաժողովը ու ԱԺ նախագահն էլ հայտարարել է դրա մասին, բայց դրանից հետո Երեւանի ավագանու իշխող խմբակցությունը խորհրդակցություն է անցկացրել ու համապարփակ վերլուծություն արել այս թեմայով, որը ուղարկել են նաեւ իրեն։ Ըստ եզրակացության իրենք փաստարկել են, որ ԱԺ-ն չունի ՏԻՄ վերաբերող հարցերը քննելու սահմանադրական իրավասություն, դա կարվի ավագանիում, հարցը քննարկել են նաեւ ՔՊ վարչության նիստում, հասկացել են, որ մեծ աղմուկ կբարձրանա, երբ մերժեն, բայց այդուհանդերձ ընտրել են իրավական ճանապարհն ու կայացրել քաղաքական որոշում։

Նիկոլ Փաշինյանը բարձր ամբիոնից ըստ էության խոստովանեց, որ խորհրդարանում հավաքված իր 88 հոգանոց թիմում չկան նորմալ իրավաբաններ, որոնք կարող էին  հայտնաբերել իրավական այդ հակասությունը, նրանց փոխարեն դա արել են ավագանու անդամները։

Անի Սահակյան