Մայիսի 9-ին ընդառաջ նոր հարձակում պլանավորվո՞ւմ է

14:50 - 4/մայիսի/2016

«Դժվար է հստակ ասել՝ Ադրբեջանը մայիսի 9-ին ընդառաջ նոր հարձակում պլանավորո՞ւմ է, թե՞ ոչ: Ես կարծում եմ, որ Ադրբեջանը հարձակում սկսելուց առաջ պետք է լուրջ հաշվարկներ անի, որովհետև, օրինակ, մայիսի 9-ին ևս մեկ հարձակում սկսել ու կրկին պարտվել, չեմ կարծում, որ սա մտնում է Ադրբեջանի պլանների մեջ: Նրանք պետք է վստահ լինեն, որ հարձակվելու դեպքում կարող են ինչ-որ հաջողության հասնել, իսկ դա որևէ մեկը չի կարող երաշխավորել: Իսկ ապրիլյան չորսօրյա պատերազմը նրանց համար վառ օրինակ է, որ հաջողության հասնելն այդքան էլ հեշտ չէ»,- լրագրողների հետ հանդիպմանը,խոսելով Ադրբեջանը ղարաբաղա-ադրբեջանական շփման գծում զինուժի տեղաշարժերի և կուտակումների մասին, ասաց քաղաքագետ Ալեքսանդր Մարգարովը: Անդրադառնալով նաև ՀՀ առաջին նախագահ Լևոն Տեր-Պետրոսյանի հանդիպումներին ՀՀ նախագահ Սերժ Սարգսյանի և ԼՂՀ նախագահ Բակո Սահակյանի հետ ասաց,որ այդ հանդիպումները պետք է դիտարկել այն տրամաբանության մեջ, որ առաջին նախագահը ցանկանում է ծանոթանալ ստեղծված իրավիճակի հետ: «Եկեք չմոռանանք, որ առաջին նախագահը ունի իր հետաքրքրությունը երկրի ներքին և արտաքին քաղաքականության մեջ: Այս տրամաբանության շրջանակներում մենք կարող ենք դիտարկել այդ երկու հանդիպումները, որոնք տեղի են ունեցել: Ընդհանուր առմամբ, որևէ մեկը չի զարմանում, երբ Հայաստանի քաղաքական գործիչները մեկնում են Արցախի Հանրապետություն, ունենում են հանդիպումներ: Այս դեպքում էլ պետք չէ զարմանալ»,- ասաց Մարգարովը: