«Թուրքը, որ թուրք է, իր երեխային իր ազգին կպահի»․ ապօրինի որդեգրման գործով տուժող մայրը՝ Ռազմիկ Աբրահամյանի մասին

Գլխավոր դատախազության առջև Ապօրինի որդեգրման գործով տուժող մայրերից մեկը պատմեց, որ 1998 թվականին տղա երեխա է ունեցել կեսարյան հատումով, որն արել է Ռազմիկ Աբրահամյանը։

Ինչպես ասաց` իր երեխան առողջ է եղել, երրորդ օրն իրեն ասել են՝ երեխադ լավ է, պատրաստվի, որ կերակրես։

«4-րդ օրն եկան և ասացին, որ երեխադ մահացել է։ Հարցրի՝ ի՞նչն է պատճառը, ասացին գիշերային հերթապահի անփութության հետևանքով։ Պահանջեցի երեխայի դին, ասացին թույլ չենք տալիս, միայն քննիչների միջոցով։ Մինչև այսօր ես իմ երեխային չեմ պատկերացրել, որ մահացած է։ Ես ծանր վիճակում եմ եղել, չեմ տեսել իմ երեխային, բայց ամուսինս տեսել էր և ասում էր, որ նա լավ է, միայն թթվածին էր միացված։ Ես անգամ մանկաբույժին հրավիրել էի պալատ հարցրել՝ երեխաս ինչպես է, նա պատասխանեց, որ իմ երեխայի վիճակը նորմալ է, պատրաստվեմ, որ կերակրեմ երեխային, ու այդպես էլ չբերեցին ու ես չտեսա իմ երեխային։ Թուրքը, որ թուրք է, իր երեխային իր ազգին կպահի, իսկ այս մարդը չգիտեմ՝ ինչ է արել հայ մայրերի հետ»,-ասաց տուժող մայրը։