Մի ժամանակ թալանչի, հիմա տաղանդավոր. Փաշինյանի վերափոխումը
Վարչապետի անունից Հայաստանի գործարար համայնքի ներկայացուցիչների համար կազմակերպված ընդունելության ժամանակ Նիկոլ Փաշինյանը հայտարարել է, որ Հայաստանի գործարար համայնքը, գործարարությամբ զբաղվող մարդիկ բացառիկ տաղանդավոր են. <<Մենք այս տարի պարծենում ենք ՀՀ-ում աննախադեպ ծավալի ճանապարհաշինական աշխատանքներ իրականացնելու համար: Եվ ուզում եմ արձանագրել, որ մենք այդ հնարավորությունն ունեցել ենք ձեր վճարած հարկերի շնորհիվ: Մենք հաջորդ տարի այդ ամբիցիաների, ինչպես նաև կապիտալ ներդրումների առումով ավելի բարձր նշաձող ենք սահմանել, չնայած այդ ոլորտում թերակատարման խնդիր ունենք, և այդ նշաձողը սահմանել ենք՝ վստահություն ունենալով ձեր վրա, վստահություն ունենալով, որ Հայաստանի գործարար համայնքը, գործարարությամբ զբաղվող մարդիկ բացառիկ տաղանդավոր են և 2020-ին նրանք վստահաբար ավելի մեծ արդյունքներ կգեներացնեն իրենց ընկերություններում՝ ավելի մեծ արդյունքներ գեներացնելով Հայաստանի և նրա ժողովրդի համար>>,- ասել է նա:
Փաշինյանի խոսքով` գրանցված տնտեսական ցուցանիշների շնորհիվ տնտեսական հեղափոխությունն իրականացվում է. 11 ամիսների արդյունքներով` արձանագրվել է 7,5 տոկոս տնտեսական ակտիվության ցուցանիշ, 7 տոկոսից ավելի տնտեսական աճ: Սա, ըստ Փաշինյանի, թիվ մեկ ցուցանիշն է մեր տարածաշրջանում և Եվրասիական տնտեսական միությունում՝ ակնհայտ առավելությամբ, և սա թիվ մեկ ցուցանիշն է ԱՊՀ-ում: <<Հայաստանում գործարարի կերպարի բնորոշիչները հենց սրանք են՝ արդար, օրինական, քրտնաջան աշխատանքով ձևավորված վաստակը՝ հենված կոնկրետ մեկ նպատակադրման վրա՝ հարստանալ և հարստացնել հայրենիքը, ժողովրդին, պետությունը>>,- հայտարարել է Փաշինյանը:
Օ, լա-լա.... կասեր դասականը: Մի ժամանակ գործարարներին Փաշինյանը բնորոշում էր որպես թալանչիներ, պետության և ժողովրդի հաշվին հարստացած հանցագործներ, այսօր, պարզվում է, նրանք բոլորը ոչ միայն տաղանդավոր են, այլ քրտինք թափող արդար վաստակի տեր հիանալի անձնավորություններ: Այս գովասանքները թերևս առաջին հերթին ուղղված են վարչապետի տիկնոջ հիմնադրամներին խոշոր նվիրատվություններ կատարած գործարարներին, որոնք տիկնոջ գրասենյակից նամակներ ստանալուն պես շատ արագ փոխանցումներ են կատարել: Փաստորեն, հայտնի ճշմարտությունը, թե փողն ամեն տեղ լույս է տալիս, այս դեպքում գործում է անշեղորեն:
Միայն թե անհասկանալի է` եթե բոլորն այսքան ազնիվ ու օրինապաշտ անհատներ են, ովքե՞ր են ապօրինի հարստացածները, որոնց դեմ հետևողականորեն պայքարում է Փաշինյանի թիմը: Անգամ պատրաստվում են օրենք ընդունել` ապօրինի գույքի բռնագնաձման մասին: Խոսք է գնում այն մասին, որ նոր օրենքով, առանց դատարանի որոշման, ապօրինի ծագում ունեցող գույքը կարող է միանգամից բռնագանձվել: Հետաքրքիր է` Փաշինյանի ասած տաղանդավոր և արդար գործարարների ունեցվածքի մեջ ապօրինի ծագում ունեցեղ գույք չկա՞:
Հայկ Դավթյան
Հետևեք մեզ Viber-ում
