Երևանի բյուջեն ճաքել է

Երեւանի ավագանու տարեվերջյան նիստում հաստատվել է Երեւան քաղաքի 2020 թվականի բյուջեն, որը եկամուտների գծով նախատեսվում է 107 մլրդ 147 մլն դրամ, ծախսերի գծով՝ 116 մլրդ 259 մլն դրամ, իսկ դեֆիցիտը կկազմի 9 մլրդ 113 մլն դրամ։
Հարցը ներկայացվող փոխքաղաքապետ Հայկ Սարգսյանը՝ նշել է, որ 2019-ի բյուջեի եկամուտների սահմանվել էին 83,77 մլրդ դրամ. «Ծրագրված եկամուտները գերազանցում են 2018-ի փաստացի հավաքագրված ընդհանուր եկամուտները 38,4 մլրդ դրամով կամ 56 տոկոսով: 2019 թվականին քաղաքի սեփական մուտքերը կազմել են 29 տոկոս, իսկ 2020-ին կկազմի 32,6 տոկոս: Սա խոսում է համայնքի անկախության ցուցանիշի աճի մասին:
2020 թվականի բյուջեի ծախսային մասի 90,3 տոկոսը բաժին է ընկնում ընթացիկ ծախսերին: 2020-ի քաղաքային բյուջեի ծախսային մասը 2019-ի հաստատված բյուջեից ավելի է 31,9 մլրդ դրամով, այդ թվում 20,8 մլրդ դրամը բյուջեով նախատեսված ցուցնաիշի ավելացումն է որպես պատվիրակված լիազորություն:
2020 թվականի բյուջեի ծախսերի մեջ սոցիալական ոլորտի ծախսերը կազմում են 31,8 տոկոս, տրանսպոտի ոլորտի ծախսերը՝ 19,5 տոկոս, շրջակա միջավայրի ծախսերը՝ 17,3 տոկոս:
Կառավարման մարմնի` քաղաքապետարանի և վարչայան շրջանների պահպանման համար նախատեսվել է 9,4 մլրդ դրամ կամ ծախսերի 8,2 տոկոս, որից աշխատավարձի ֆոնդը կկազմի 5,5 մլրդ դրամ, պարգեւատրման ֆոնդը՝ 1.89 մլրդ դրամ (նախորդ տարվանից 100 մլն-ով պակաս): Նկատենք սակայն, որ
աշխատավարձային ֆոնդը կազմում է Երևանի սեփական եկամուտների շուրջ 40 %-ը. այսինքն՝ փողի գրեթե կեսը կծախսվի ադմինիստրացիայի ծախսերի վրա, որը խոսում է շատ մեծ ուռճացվածության մասին:
Աննախադեպ մեծ է նաև բյուջեի դեֆիցիտը. 9 մլրդ 113 մլն դրամ, որը կազմում է Երևանի բյուջեի 8 տոկոսը։
Համեմատությա համար նշենք, որ 2019 թվականին Երևանի բյուջեի դեֆիցիտը կազմել է 1 մլրդ 269 մլն դրամ, իսկ եկամուտները եղել են 83 մլրդ 77 մլն դրամ: Այսինքն` դեֆիցիտը կազմել է բյուջեի մուտքերի մոտ 1,5 տոկոսը: Իսկ Երևանի 2018 թվականի բյուջում դեֆիցիտը ընդամենը 48 մլն դրամ է կազմել, այն դեպքում, երբ եկամուտները պլանավորված են եղել 80 մլրդ 189 մլն դրամ: Այսինքն` դեֆիցիտը կազմել է մուտքերի ընդամենը 0,06 տոկոսը: 2017թ. բյուջեի ծախսերի ծավալը ծրագրվել է 84 մլրդ 413 մլն դրամի չափով, իսկ դեֆիցիտը՝ 68 մլն դրամ, որը կազմում է բյուջեի 0,08 տոկոսը:
Մինչդեռ 2020 թ. Երևանի բյուջեում դեֆիցիտը պլանավորված է 9 մլրդ 113 մլն դրամ, այսինքն` եկամուտների 8,5 տոկոսը: Փաստորեն` դեֆիցիտը նախորդ տարիների համեմատ բազմապատիկ անգամներ աճել է:
Այս առումով Երևանի 2020 թվականի բյուջեն կատաստրոֆիկ է: Ընդ որում, որպես դեֆիցիտի ֆինանսավորման աղբյուր, նշվում է արտաքին և ներքին պարտքերի ավելացումը: Իսկ թե հետագայում ինչպես է քաղաքը դուրս գալու այս պարտքի տակից, հայտնի չէ:
Ընդամենը արձանագրենք, որ նախկին քաղաքապետ Տարոն Մարգարյանը, որին անընդհատ մեղադրում էին Երևանի միջոցները վատնելու մեջ, երբեք այսպիսի մեծ ճեղքավածքով բյուջեի պլանավորում թույլ չի տվել: Իսկ Հայկ Մարությանի գալուց հետո բառիս ամենաուղիղ իմաստով Երևանի բյուջեն ճաքել է:

Հայկ Դավթյան