Բատկան Պուտինին մեղադրեց պատերազմ հրահրելու մեջ. Հայաստանը ժամանակին էր հրաժարվել ռուսական առաջարկից

Ռուսաստանը Բելառուսին «ճնշում է» ինտեգրացիայի հասնելու համար, սակայն երկրի անկախությունը ապահովված է արևմտյան երկրների ուժերի և ՆԱՏՕ-ի հավասարակշռությամբ: Եթե Ռուսաստանը փորձի միացնել հարևան երկիրը, ապա կներքաշվի ռազմական հակամարտության մեջ: Այս մասին հայտարարել է Բելառուսի նախագահ Ալեքսանդր Լուկաշենկոն «Էխո Մոսկվի» ռադիոկայանի գլխավոր խմբագիր Ալեքսեյ Բենեդիկտովին տված հարցազրույցում:

«Եթե Ռուսաստանը փորձի խախտել մեր ինքնիշխանությունը, դուք գիտեք, թե ինչպես կարձագանքի ոչ միայն միջազգային հանրությունը, այլ նաև կներքաշվի պատերազմի մեջ: Դա արդեն Արևմուտքն ու ՆԱՏՕ-ն չեն հանդուրժի, քանի որ կդիտարկեն որպես սպառնալիք իրենց դեմ, ինչում էլ իրավացի են», - ասել է Լուկաշենկոն:

Մոսկվան ու Մինսկը դեռևս 1999 թվականին Միութենական պետության մասին պայմանագիր են կնքել, որը, սակայն, դեռ թղթի վրա է: Կողմերին չի հաջողվում ընդհանուր հայտարարի գալ անգամ դրա իրականացման ճանապարհային քարտեզի շուրջ: Անցած շաբաթներին Ռուսաստանի և Բելառուսի նախագահների հերթական հանդիպումներն ավարտվել են ապարդյուն:

Հայտնի դարձավ, որ Ռուսաստանի և Բելառուսի նախագահներին չի հաջողվել համաձայնության գալ առանցքային երեք հարցերի՝ նավթի, գազի ու հարկերի շուրջ: Սանկտ Պետերբուրգում երկու առաջնորդների հանդիպումից հետո այս մասին հայտնել էր Ռուսաստանի տնտեսական զարգացման նախարար Մաքսիմ Օրեշկինը:

Թե որոնք են հիմնական տարաձայնությունները, վերջինս չի մանրամասնել, բայց տեղեկացրել է, որ երկու նախագահները մտադիր են առաջիկայում ևս մեկ հանդիպում ունենալ:

Լուկաշենկո-Պուտին բանակցություններին զուգահեռ՝ Մինսկում երեկ հարյուրավոր ցուցարարներ կրկին փողոց էին դուրս եկել Ռուսաստանի հետ հնարավոր միավորման և «խորացված ինտեգրացիայի» դեմ: Սա ընդդիմադիրների արդեն երրորդ բողոքի ակցիան էր այս շաբաթվա մեջ: Ավելի քան երեք ժամ ընդդիմադիրները վանկարկել են՝ «Ո՛չ կայսերական Ռուսաստանի հետ միությանը», ապա կենդանի պատ կազմել Անկախության պողոտայում:

Կրեմլը պահանջում է Բելառուսից խորացնել տնտեսական համագործակցությունն ու համակարգված դրամավարկային քաղաքականություն վարել՝ ռուսական էներգակիրները ցածր գնով ստանալու դիմաց: Ընդդիմադիրները պնդում են՝ դա է՛լ ավելի կխորացնի Մինսկի կախվածությունը Ռուսաստանից ու հարվածի տակ կդնի Բելառուսի պետականությունն ու անկախությունը:

Հիշեցնենք, որ դեկտեմբերի սկզբին Սոչիում Ռուսաստանի նախագահ Վլադիմիր Պուտինը և Բելառուսի նախագահ Ալեքսանդր Լուկաշենկոն քննարկեցին երկու երկրների ինտեգրումը խորացնելու հարցերը: Դրանից առաջ Մինսկի կենտրոնում, Անկախության պողոտայում բողոքի ակցիա է անցկացվում Ռուսաստանի հետ ինտեգրման դեմ: Հարյուրավոր ցուցարարներ կենդանի շղթա են կազմել: Նրանք պահում են նաև սպիտակ-կարմիր-սպիտակ գույնի դրոշներ, որը մինչև 1995 թվականը Բելառուսի պետական դրոշն էր:

Դեկտեմբերի 5-ին ելույթ ունենալով Բելառուսի նորընտիր խորհրդարանի առաջին նիստում, Ալեքսանդր Լուկաշենկոն ասել էր, թե Բելառուսը Ռուսաստանի կազմի մեջ չի մտնի:

1990-ականների կեսերին Հայաստանում ևս նախաձեռնություն էր սկսվել ռուս-բելառուսական միությանը միանալու պահանջով: Երևանի կենտրոնում գրասենյակ էր բացվել, որի ակտիվիստները ստորագրահավաք էին անցկացնում երկրով մեկ: Սակայն Հայաստանի իշխանությունները այդ նախաձեռնությունը հակասահմանադրական համարեցին, հայտարարելով, որ այն ուղղված է երկրի անկախության և ինքնիշխանության դեմ:

Մետաքսյա Շալունց