Պուտինը սրտատրոփ սպասում է Փաշինյանին ու Ալիևին

Ռուսաստանի նախագահ Վլադիմիր Պուտինն այսօր Սանկտ Պետերբուրգում հանդիպելու է ադրբեջանցի պաշտոնակից Իլհամ Ալիևի հետ:

Այս տարվա ընթացքում երկու նախագահներն արդեն երկու անգամ են հանդիպել. ապրիլի 26-ին Պեկինում՝ «Մեկ գոտի, մեկ ուղի» համաժողովի, ապա հոկտեմբերի 3-ին Սոչիում՝ «Վալդայան ֆորումի» շրջանակներում:

Հիշեցնենք, որ դեկտեմբերի 2-3-ը Ռուսաստանի արտգործնախարար Սերգեյ Լավրովն է այցելել Բաքու, որտեղ հանդիպեց Ադրբեջանի նախագահի և արտգործնախարար Էլմար Մամեդյարովի հետ: Այցի նախօրեին Լավրովի ղեկավարած գերատեսչությունը հավաստիացրել է, որ Ռուսաստանը շարունակելու է ակտիվ դեր կատարել Լեռնային Ղարաբաղի հակամարտության կարգավորման հարցում:

«Լեռնային Ղարաբաղի հակամարտության կարգավորման գործընթացում կողմերին աջակցելն առաջնային խնդիր է Ռուսաստանի արտաքին քաղաքականության օրակարգում, և այն Ռուսաստանի նախագահի ուշադրության կենտրոնում է: Հակամարտությունը պետք է լուծվի բացառապես քաղաքական-դիվանագիտական միջոցներով, կողմերի երկխոսության եղանակով: Մենք հետագայում էլ նպաստելու ենք կարգավորման գործընթացին և՛ որպես ԵԱՀԿ-ի Մինսկի խմբի համանախագահող, և՛ որպես Ադրբեջանի և Հայաստանի հետ սերտ կապեր ունեցող երկիր», - ասված էր Ռուսաստանի արտգործնախարարության հայտարարությունում:

Դրանից ավելի վաղ՝ նոյեմբերի 20-25-ը, Ադրբեջանի առաջին փոխնախագահ Մեհրիբան Ալիևան էր այցելել Մոսկվա, որտեղ նրան ընդունել են ամենաբարձր մակարդակով: Ալիևան հանդիպել է նախագահ Վլադիմիր Պուտինի, վարչապետ Դմիտրի Մեդվեդևի և Ռուսաստանի խորհրդարանի վերին պալատի՝ Դաշնության խորհրդի նախագահ Վալենտինա Մատվիենկոյի հետ:

Պուտինը Մոսկվայում Ալիևային շնորհել է «Բարեկամության շքանշանը»: Ռուսաստանի նախագահն ասել է, որ Ադրբեջանի առաջին փոխնախագահն այդ պարգևին է արժանացել «ռուս-ադրբեջանական հարաբերությունների զարգացմանը նպաստելու համար»:

Ալիևայի մոսկովյան այցի օրերին էլ Կրեմլը հայտնել է, որ այս տարվա դեկտեմբերի 20-ին Ադրբեջանի նախագահը կայցելի Սանկտ Պետերբուրգ, որտեղ նախատեսված է հանդիպում Պուտինի հետ:

Սանկտ Պետերբուրգում այսօր գումարվում է Եվրասիական բարձրագույն տնտեսական խորհրդի նիստը, որին մասնակցում է Հայաստանի վարչապետ Նիկոլ Փաշինյանը, ուստի չի կարելի բացառել, որ Ռուսաստանի Հյուսիսային մայրաքաղաքում տեղի կունենա նաև Հայաստանի և Ադրբեջանի ղեկավարների հանդիպումը:
Վարչապետի խոսնակ Վլադիմիր Կարապետյանը «Ազատությանն» ասել է, որ Փաշինյան-Ալիև հանդիպում Սանկտ Պետերբուրգում նախատեսված չէ, սակայն կայանալու է պաշտոնական ընթրիք, որին մասնակցելու են Հայաստանի վարչապետն ու Ադրբեջանի նախագահը:

Փաստորեն, Պուտինը հյուրընկալելու է Փաշինյանին և Ալիևին: Նրանք մեկ սեղանի շուրջ են հավաքվելու, հնարավոր է քննարկեն որոշ թեմաներ, այդ թվում և ղարաբաղյան հակամարտությունը:

Այս պահին հայտարարված չէ, թե արդյոք կկայանա Պուտին-Փաշինյան առանձին հանդիպում: Եթե ոչ՝ ապա կստացվի Պուտինը Ալիևի հետ առանձին հանդիպում է, իսկ Փաշինյանի հետ՝ ոչ:

Մինչդեռ օրերս Ռուսաստանի Դաշնային խորհրդի արտաքին հարաբերությունների հանձնաժողովի ղեկավար Կոնստանտին Կոսաչևը վստահեցնում էր, թե Հայաստանի և Ռուսաստանի հարաբերությունները գտնվում են առավելագույն բարձր մակարդակի վրա: Երևանում կայացած ՀՀ արտաքին հարաբերությունների մշտական հանձնաժողովի հետ համատեղ հանդիպումից հետո նա նշել էր.«Մեր երկրի համար, մեր խորհրդարանի համար Հայաստանի հետ գործակցությունը գտնվում է առավելագույն բարձր մակարդակի վրա: Դա, բնականաբար, և՛ երկու խորհրդարանների ղեկավարների պարբերական հանդիպումներն են, և,՛երկկողմ հանձնաժողովները, որոնք հավաքվում են տարեկան երկու անգամ: Մենք Դաշնային խորհրդում շփումների այդպիսի ինտենսիվություն արտասահմանցի գործընկերների հետ, բացի Ղազախստանից, չունենք»,- ասել է Կոսաչևը: Նրա խոսքով՝ համատեղ նիստի ընթացքում առանցքային թեմաներից մեկը եղել է եվրասիական ինտեգրումը: «Մենք չենք խոսել այն մասին՝ լինել, թե չլինել, այլ այն մասին, թե լրացուցիչ ինչ է անհրաժեշտ, որպեսզի այդ նախագիծը զարգանա»:

Մետաքսյա Շալունց