Ոչ ադեկվատ, անպատրաստ մարդիկ են այսօր ղեկավարում երկիրն ու այն տանում կործանման. Արտաշես Գեղամյան (տեսանյութ)
Վերջին երկու տարիների ընթացքում հրապարակայնորեն ելույթներ չեմ ունեցել, ինչի փոխարեն հասցրել եմ երկու գիրք գրել՝ արտահայտելով քաղաքացիական իմ դիրքորոշումը, Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ժամանակ ասել է «Ազգային միաբանություն» կուսակցության նախագահ Արտաշես Գեղամյանը:
Նրա խոսքով՝ եթերում չհայտնվելու հիմնական պատառներից է նաև լրատվամիջոցներից մի քանիսի իշխանամետ լինելը և մյուս մասի՝ ընդդիմադիր կեցվածք ունենալը. «Ընդդիմադիր հարթակներում ելույթներ չեմ ունեցել, որպեսզի չսրվի՝ Արտաշես Գեղամյան-«ժողվարչապետ» հարաբերությունները»:
Արտաշես Գեղամյանը պատրաստ է իր փորձով օգնել, որպեսզի երկիրը դուրս գա աշխարհաքաղաքական ծանր դրությունից:
Խոսելով դեռևս այն ժամանակվա ընդդիմադիր պատգամավոր Նիկոլ Փաշինյանի հետ տեղի ունեցած ընդհարումից՝ Արտաշես Գեղամյանն ասել է, որ ինքը շարունակում է պնդել, որ որևէ բռնություն չի կիրառել Փաշինյանի նկատմամբ, և այդ էջը վաղուց փակված է, չնայած երբեք էլ բացված չի եղել:
Դիտարկմանը՝ հնարավո՞ր է, որ այդ միջադեպն այդուհանդերձ որոշակի վերաբերմունք ձևավորել է Արտաշես Գեղամյան անձի հանդեպ, Գեղամյանը պատասխանել է, որ իրեն ընդհանրապես չի հետաքրքրում՝ ինչ վերաբերմունք ունի այս իշխանությունն իր նկատմամբ։
«Ինձ անհանգստացնում է, թե այս իշխանությունն ինչ վերաբերմունք ունի այն մարդկանց նկատմամբ, որոնց ես հարգում եմ: Ես մտահոգված եմ, որ անպատրաստ, ոչ ադեկվատ մարդիկ ղեկավարում են երկիրն ու այն տանում են կործանման»,– ասել է նա: Ըստ Գեղամյանի՝ Հայաստանն ունի ոչ ադեկվատ վարչապետ, որը ստում է, ասելով՝ պետական համակարգը դիմադրում է հեղափոխությանը:
Անդրադառնալով մոտ երկու տարի առաջ Հայաստանում տեղի ունեցած հեղափոխությանը, այնուհետև խորհրդարանական արտահերթ ընտրություններին՝ Արտաշես Գեղամյանն ասել է. «Դե, որ Նիկոլ Փաշինյանը 70-% ձայն էր ստացել, ուրեմն թող ճանաչեր Արցախի անկախությունը, թող այնպես աներ, որ Արցախը դառնա բանակցային կողմ և ընդհանրապես, եթե այդքան ձայն էր ստացել, ասֆալտին փռելու փոխարեն, թող գիրք կարդար, որպեսզի Կառավարության նիստի ժամանակ չասեր՝ իր կողմից ձևավորված պետական համակարգը հակահեղափոխական է»: Արտաշես Գեղամյանի դիտարկմամբ՝ Նիկոլ Փաշինյանը ղեկավարում է երկիրը, որից ընդհանրապես բան չի հասկանում:
«Այս իշխանությունը խճճում է Արցախի հարցը՝ խոսելով մադրիդյան սկզբունքներից, Լավրովի պլանից, կազանյան սկզբունքներից, մինչդեռ այս ամենի պատասխանը հստակ տվել է Սերժ Սարգսյանը՝ Զագրեբի իր ելույթում՝ ուղիղ մեսիջ ուղարկելով Ադրբեջանին»,- ասել է Արտաշես Գեղամյանը՝ անդրադառնալով արցախյան հիմնախնդրին:
Անդրադառնալով Արցախում սպասվող նախագահական ընտրություններին՝ Արտաշես Գեղամյանն ասել է, որ Արցախում պետք է ունենանք Վիտալի Բալասանյանի նման ռազմական գործիչ նախագահ, քանի որ ադրբեջանական կողմից հնչում են բացառապես ռազմատենչ հայտարարություններ:
Հետևեք մեզ Viber-ում
