Նիկոլ Փաշինյանին քավության նոխազ է անհրաժեշտ

 Կառավարության նիստում վարչապետ Նիկոլ Փաշինյանը հայտարարել է, որ պետական կառավարման համակարգը դիմադրում է հեղափոխությանը և պետության մեջ տեղի ունեցած բոլոր առաջընթացները տեղի են ունեցել ի հեճուկս պետական կառավարման համակարգի.

«Այս տարվա տնտեսական բոլոր ցուցանիշները և ընդհանրապես ամեն ինչը արվում ա ի հեճուկս պետական կառավարման համակարգի։ Ես ուղիղ ասում եմ՝ որպես ՀՀ վարչապետ, ինչ հաջողություն և ձեռքբերում մենք էսօր ունենք, ամբողջ 100 տոկոս ի հեճուկս պետական կառավարման համակարգի է,- զայրացած հայտարարել է վարչապետը և շարունակել.- մենք էլ մեզ դրել ենք սկզբունքայինի տեղ՝ ինչ գիտնականի մի տեղ դնում ես, պարզվում է՝ դիսերտացիայի կեսը կեղծ ա, վերջում էլ դու ես մեղավոր դուրս գալիս՝ ասում ա՝ բոլորինը կեղծ ա, իմն էլ ա կեղծ, էդ խի՞ եք իմ վրա կենտրոնացել։ Ճիշտ ա ասում մարդը, բա էս կեղծիքի միջավայրում ինչքա՞ն ենք կարողանալու ապրել»,- այսօր կառավարության նիստին հայտարարել է վարչապետ Նիկոլ Փաշինյանը։
Փաշինյանի խոսքով` եթե անգամ այսօր հայտարարվի, թե պետական կառավարման համակարգի բոլոր հաստիքները թափուր են և պետք է նոր աշխատողներ հրավիրել, բավարար քանակի պրոֆեսիոնալներ չեն գտնվի` համալրելու այդ տեղերը: Ապա այստեղից նա սահուն անցում կատարեց դեպի դպրոցներ` ասելով, թե այս ամենի պատճառն այն է, որ դպրոցներում երեխաներին չեն տալիս այն գիտելիքները, ինչը պետք է մարդուն:
Դժվար է միանշանակ ասել, թե ինչու հանկարծ Փաշինյանը որոշեց պետական կառավարման համակարգին միանգամից հռչակել հակահեղափոխական: Իսկ հեղափոխական ինչ խնդիր է դրվել պետական կառավարման համակարգի առջև, որը չի լուծվել: Պետական համակարգի բարձրագույն բոլոր պաշտոնները` նախարար, փոխնախարար, կոմիտեների և ծառայությունների նախագահներ, մի խոսքով` քաղաքական թիմի պորտֆելները ամբողջությամբ տրված են հեղափոխական կադրերին: Նրանց բոլորին նշանակել է Նկոլ Փաշինյանը, և նրանք են պատասխանատու այսօրվա քաղաքականության և ծրագրերի համար: Արդյոք Փաշինանի նշանակած կադրերը հստակ պատկերացում ունեն և գիտեն, թե ինչ են ուզում իրենց ենթակայությամբ աշխատող պետական կառավարման համակարգից, պատկերացում ունեն, թե ինչպես պետք է սահմանել նպատակ և ինչ ճանպարհով հասնել դրան: Ի վերջո, նախ և առաջ անհրաժեշտ է` ճիշտ խնդիր դնել և, որ առավել կարևոր է, խնդիր դնողը պետք է անձամբ պատկերացում ունենա իր դրած խնդրի լուծումից:
Այնպիսի տպավորություն է, թե Նիկոլ Փաշինյանին քավության նոխազ է անհրաժեշտ, և պետական կառավարման համակարգը ամենահարմար թեկնածուն է: Ի դեպ, Սերժ Սարգսյանը ևս պետական կառավարման համակարգի հետ կապված երբեմն-երբեմն նման պոռթկումներ ունենում էր` անհասցե մեղադրանքներ հնչեցնելով ապաշնորհ կառավարիչների հասցեին: Իսկ երբ դանակը ոսկորին էր հասնում, պաշտոնանկ էր անում նախարարներին ու վարչապետերին: Իրականում դա հրաշալի ձև էր` փրկելու սեփական անփառունակ կառավարումն ու տապալումը: Փաշինյանը կարծշես թե կրկնում է այս տրյուկը:

 Հայկ  Դավթյան