Պերմյակովը խոստովանե՞լ է, որ սպանությունն ինքը չի արել
Գյումրիում տեղակայված 102-րդ ռուսական ռազմաբազայում այսօր շարունակվել է եւ ավարտվեց ռուսական ռազմաբազայի զինծառայող, Ավետիսյանների ընտանիքի սպանդի գործով ամբաստանյալ Վալերի Պերմյակովի նախաքննական ցուցմունքների հրապարակումը: Պերմյակովը սկանդալային հայտարարություններ է արել՝ պատասխանելով փաստաբանների հարցերին։ Նախ պարզվել է, որ նա բազմաթիվ հակասական ցուցմունքներ է տվել։ Վալերի Պերմյակովը պնդում է, որ փոքրիկ Հասմիկ Ավետիսյանին սպանելիս գործի է դրել զենքին ամրացված սվին-դանակը: Նա նույնն էր պնդել նաեւ դատահոգեֆիզիոլոգիական փորձաքննության ժամանակ: Սակայն հայտնի է, որ Հասմիկ Ավետիսյանի վրա չեն հայտնաբերվել սվին-դանակի հետքեր: Փորձաքննության արդյունքները վկայում են նաեւ, որ Սերյոժա Ավետիսյանը փորձել է դիմադրություն ցույց տալ: Սակայն Պերմյակովը հարցաքննություններում միանշանակ պնդում է, որ նման բան չի եղել, ինքը հեռվից է կրակել։ Ըստ «Արմենպրեսի»՝ ԴՆԹ փորձաքննության արդյունքների համաձայն Պերմյակովի ինքնաձիգի վրա հայտնաբերվել է Սերյոժա Ավետիսյանի մատնահետքը, Սերյոժա Ավետսյանի դիակի վրա վզի շրջանում հայտնաբերվել են նաև քերծվածքներ, որը վկայում է այն մասին, որ Պերմյակովը կրակելու ժամանակ շատ մոտ է գտնվել: Մեկ այլ հարցաքննության ժամանակ քննիչի այն հարցին, թե ինչու է Պերմյակովը սպանել փոքրահասակ երեխաներին, Պերմյակովը պատասխանել է. «Աղմուկ էր, երեխաները լաց էին լինում, դրսում շները հաչում էին, սպանեցի, որ այդ աղմուկը դադարի»,- նշել է Պերմյակովը: Հակասություններ եղել են նաև երեխաների սպանության հետ կապված հարցաքննությունների ժամանակ: Պերմյակովն ասել է, որ ճիշտ չի հիշում նաեւ, թե դանակի քանի հարված է հասցրել Սերյոժա Ավետիսյանին: Քննիչը հարցրել է՝ արդյոք Պերմյակովը զղջացել է իր արարքի համար, պատախանել է՝ այո:Պերմյակովը ցուցմունքներում նշել է նաեւ, որ Ավետիսյանների տանը ջրի ծորակից ջուր է խմել, մինչդեռ չի եղել ջրամատակարարում: Ավարտելով ցուցմունքների հրապարակումը՝ փաստաբանները մի շարք հարցեր են ուղղել Պերմյակովին՝ դրդելով նրան սենսացիոն բացահայտման: Չնայած նրան, որ Պերմյակովն ասել է, թե զղջում է, խղճում է Ավետիսյանների ընտանիքին: Հարցին էլ, թե ինչ կերպ է արտահայտում զղջումը, պատասխանել է՝ ոչ մի կերպ: Ասելիք չունի՞ արդյոք Ավետիսյանների հարազատներին, արձագանքել է՝ ոչ, նա վերջում բացահայտել է ամիսներ շարունակ շրջանառվող վարկածն այն մասին, որ իրականում ինքը չի կատարել այդ ոճրագործությունը։ «Եթե որևէ մեկը քեզ ասեր, որ ինչ-որ մեկը յոթ անձի է սպանել, ինչ կասեիր», փաստաբանի հարցին Պերմյակովը պատասխանել է: «Ես կասեի, որ խելագար է: Բայց պարկերացրեք ես այդպիսին չեմ»: Պերմյակովը գրեթե բաց տեքստով խոստովանել է, որ ինքը չէ սպանություն կատարած անձը, ինքը խելագար չէ, միայն խելագարները կարող են նման սպանություն իրագործել։ Անի Սահակյան
Հետևեք մեզ Viber-ում
