Ռուսական կողմը ջրել է Միհրան Պողոսյանի գործը

 Միհրան Պողոսյանի նկատմամբ ընտրված խափանման միջոցը վերացվել է։ Այս մասին տեղեկացրել է ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը . «ՀՀ դատախազությունում առկա տեղեկատվության համաձայն Մ. Պողոսյանի նկատմամբ ՌԴ-ում ընտրված խափանման միջոցը վերացվել է»։

Հիշեցնենք, որ Միհրան Պողոսյանի հետախուզման մեջ գտնվելու մասին հայտարարվել էր ապրիլի 15-ին: Նա Հայաստանում մեղադրվում էր առանձնապես խոշոր չափերով փողերի լվացման համար:
ՀՔԾ-ի տարածած պաշտոնական հաղորդագրության համաձայն` քննիչը որոշում էր կայացրել ՀՀ դատական ակտերի նախկին գլխավոր հարկադիր կատարող Միհրան Պողոսյանին ՀՀ քրեական օրենսգրքի 179-րդ հոդվածի 3-րդ մասի 1-ին կետով և 308-րդ հոդվածի 2-րդ մասով մեղադրյան ներգրավելու մասին: Նրա նկատմամբ որպես խափանման միջոց էր ընտրվել կալանավորումը:
Հետախուզման մեջ գտնվող Մ.Պողոսյանը ապրիլի 19-ի երեկոյան ձերբակալվել էր Ռուսաստանում։ Նա հայտնաբերվել էր Կարելիայի հանրապետությունում, որտեղ փորձել էր հյուրանոցում սենյակ ամրագրել։ Ավելի ուշ՝ ապրիլի 24-ին, Պողոսյանի փաստաբան Միխայիլ Յամչիտսկին «Ռունա» պարբերականին հայտնել էր, որ իր պաշտպանյալը քաղաքական ապաստան ստանալու խնդրանքով դիմել է ՌԴ-ին:
Օգոստոսին հայտնի դարձավ, որ ՌԴ գլխավոր դատախազությունը մերժել է ՀՀ ԴԱՀԿ նախկին պետ Միհրան Պողոսյանին Հայաստան արտահանձնելու միջնորդությունը։ Նա Ռուսաստանում ժամանակավոր կացության իրավունք է ստացել։ Փաստացի նա այժմ արդեն ՌԴ իրավապահների հետ այլևս խնդիր չունի, քանի որ խափանման միջոց այլևս չկա: Սա առնվազն նշանակում է, որ Հաաստանի իրավպահների կողմից հայտարրաված հետախուզումն ու կալանավորման որոշումը, ինչպես նաև նրան վերադարձնելու միջնորդությունը ռուսական կողմը ջրել է :
Ամիսներ առաջ https://hayeli.am/ -ը տեղակություն էր հրապարակել, որ Միհրան Պողոսյանը մինչ ձերբակալությունը տարբեր մարդկանց մոտ պատմել է, որ ՀՀ իշխանություններն իրենից 20 մլն դոլար են պահանջել ազատությունը վայելելու դիմաց, ինչը ինքը մերժել է։ Թերևս ճարպիկ ու արագ կողմնորոշվող ԴԱՀԿ նախկին պետը ՌԴ-ում կարողացել է ավելի էժան ու հարմար ճանապարհ գտնել: Մյուս կողմից էլ` Միհրան Պողոսյանին չվերադարձնելով ՌԴ իշխանությունները հերթակա անգամ ի ցույց են դնում իրենց վերաբերմունքը ՀՀ հեղափոխական իշխանության նկատմամբ` ընդգծելով, որ  Նիկոլ Փաշինյանի հռչակած հակակոռուպցիան պայքարը, որի թելերը հաճախ ձգվում են մինչև Ռուսաստան, իրենց սրտով չէ և իրենք կփորձեն դրա դեմն առնել: Այնպես որ, Միհրանի գործով դեռ կարող եմ նոր զարգացումներ լինել:

Հայկ Դավթյան