Եթե գործ տվող ու ստուկաչ չես, պիտի դատվես

Հայաստանի նախկին գլխավոր դատախազ Գևորգ Կոստանյանի նկատմամբ հայտարարվել է հետախուզում, միջնորդություն է ներկայացվել դատարան՝ նրա նկատմամբ կալանավորումը որպես խափանման միջոց ընտրելու համար: Երկուշաբթի օրը հաղորդվեց, որ ՀՔԾ-ն որոշել է մեղադրյալ ներգրավել Գևորգ Կոստանյանին 2008 թվականի Մարտի 1-ի գործով , նրան առաջարկել էին 48 ժամվա ընթացքում ներկայանալ վարույթն իրականացնող մարմին՝ մեղադրանք առաջադրելու համար:
Կոստանյանն արդեն երկու ամիս է Մոսկվայում է՝ դասավանդում է Ռուսաստանի գլխավոր դատախազության համալսարանում: Մեզ հետ զրույցում եւ առհասարակ տարբեր լրատվամիջոցներով նա անդրադարձել է իր նկատմամբ իրավապահների գործողություններիցն եւ անհեթեթություն է որակել իրեն առնչվող հոդվածը:
Այնուամենայնիվ, ինչ կատարվեց վերջին մեկ տարվա ընթացքում եւ ինչու Կոստանյանի հարցում իշխանությունների վերաբերմունքը շրջադարձ ունեցավ:

Դեռեւս մեկ տարի առաջ, երբ դեռ արտահերթ ընտրությունները չէին եղել եւ նախկին խորհրդարանը գործում էր , նախկին իշխանությունը՝ դիմադրում, Գևորգ Կոստանյանը հասկանալով պահի լրջությունը հայտարարեց, որ ամբողջությամբ աջակցում է վարչապետ Նիկոլ Փաշինյանին, և արտահերթ խորհրդարանական ընտրություններ անցկացնելը քաղաքական անհրաժեշտություն է։ Կոստանյանը հայտարարեց նաեւ, որ հավատում է Փաշինյանին.«Ազնիվ ա իր նպատակների մեջ, ազնիվ ա իր ցանկությունների մեջ: Ինձ համար սա չափազանց կարևոր նշանակություն ունի․․․ Եվ ազնիվ ա իր քաղաքական ուղղվածություն մեջ, որը ինձ համար ընդունելի է անձնապես: Այլ հարց է, թե դա հիմա ինչ չափով է իրականացվում: Իմ ասած հետևյալն է, որ եթե ես գտնում եմ, որ և՛ նպատակների, և՛ ցանկությունների, և՛ գործողությունների հաջորդականության մեջ կա էդ ազնվությունը և երկրի բարօրությանն ուղղված ա իրականացվում, ես միշտ կկանգնեմ իրա կողքին, ցանկացած պահի»:
Սրանից հետո համառորեն լուրեր էին շրջանառվում, որ Կոստանյանը կրկին բարձր պաշտոն կզբաղեցնի, միգուցե գլխավոր դատախազի, կամ ԱԱԾ տնօրենի տեղակալի, անգամ իշխանության որոշ ներկայացուցիչներ հրապարակային հայտարարեցին, որ Կոստանյանը պրոֆեսիոնալ իրավաբան է, հմուտ մասնագետ՝ ըստ էության չբացառելով այդ լուրերը: Ապա տեղեկատվություն տարածվեց այն մասին, որ իշխանությունը Կոստանյանին առաջարկել է ցուցմունք տալ Սերժ Սարգսյանի դեմ՝ Մարտի 1-ի գործով եւ առհասարակ, իսկ թե ինչ եղավ հետո, բոլորիս է հայտնի…
Կոստանյանի վերաբերյալ իրադարձությունների այս քրոնիկոնից կարելի է պատկերացում կազմել, թե ինչու տեղի ունեցավ շրջադարձը: Այս իշխանությունների ՝ մարդուն գնահատելու արժեհամակարգը ոչ թե պրոֆեսիոնալիզմն է, մարդկային ու բարոյական հատկանիշները, այլեւ գործ տալն ու ստուկաչությունը: Ցանկացած մեկը, ով կհամաձայնի ցուցմունք տալ նախկին երկու ղեկավարների դեմ, կդառնա այս իշխանությունների սիրելին, ամենապրոֆեսիոնալը, որին կարող են ամենապատասխանատու պաշտոնը վստահել: Հատկապես իրավապահ համակարգի ղեկավար կազմում տեղ ունենալու համար պետք է անվերապահ կատարես Փաշինյանի բոլոր քմահաճությունները, մասկի շոուներ կազմակերպես, գիշերային ահաբեկումներ, արյուն, ծեծ, ջարդ եւ նման բարբարոսություններ:

Անի Սահակյան