Պուտինը Իլհամին՝ Մեհրիբանով փոխելու է «օպերացիա» է գծում

Մի քանի օր է, ինչ մամուլում և համացանցում քննարկվում է օրեր առաջ Ռուսաստանի նախագահի և վարչապետի կողմից Ադրբեջանի նախագահի կնոջը, երկրի առաջին փոխնախագահին՝ Մեհրիբան Ալիևային ընդունելու փաստը:

Ադրբեջանի ներկայի նախագահ Իլհամ Ալիևի փոխարինողը հարցը պարբերաբար քննարկվում է թե՛ Ադրբեջանում, թե՛ երկրի սահմանների դուրս:

Մի պահ նրա հավանական փոխարինող էր նշվում նրա որդին՝ կրտսեր Հեյդարը: Սակայն հաշվի առնելով տարիքը, չի բացառվում, որ իսկապես ադրբեջանական իշխանական վերնախավում կանգ առնեն Ալիևի կնոջ՝ Մեհրիբան Ալիևայի վրա:

Առանց այդ էլ, Ադրբեջանի իշխող վերնախավում Ալիևների ու Փաշաևների (Մեհրիբան Ալիևայի հոր) գերդաստանների միջև ընթացող ուժերի և ազդեցության պայքարի մասին պարբերաբար տեղեկություններ են շրջանառվում: Ադրբեջանցի փորձագետները նշում են, որ այդ պայքարը երբեմ շատ սուր է արտահայտվում, դրա արդյունքում Ադրբեջանի իշխանական վերնախավում պարբերաբար փոփոխություններ, վերադասավորություններ են տեղի ունենում:

Այս ամենը Ադրբեջանի ներսում...

Իսկ Ադրբեջանից դուրս՝ ի՞նչ են մտածում Ալիևին փոխարինելու մասին: Չէ՞ որ այդ օրը վաղ թե ուշ կգա:

Այստեղ պետք է պատասխանել հարցին, թե ինչու է այս հարցը վաղ թե ուշ սրվելու: Ի վերջո, բոլորի համար հասկանալի է, որ բռնապետ Ալիևին փոխարինելը կդառնա բոլորի համար ընդունելի լուծում՝ բոլոր առումներով: Երկրում սոցիալ-տնտեսական իրավիճակը վատ է, իշխանությունում գերհարստացած միլիոնատերեր են, ալիևյան՝ միլիարդատերների կլան, որը իշխանությունը պահում է «Լեռնային Ղարաբաղը վերադարձնելու» մասին հավաստիացումներով սնելով սեփական հասարակությանը: Եվ դա իրականացնելիս ճնշում երկրի ներսում բողոքի բոլոր ընդվզումները, բանտարկում ընդդիմադիր իրավապաշտպաններին, լրագրողներին:

Այնպես որ, Ադրբեջանի սահմաններից դուրս էլ, վստահաբար, մտորում են Ալիևին «արժանիով» փոխարինելու մասին: Եվ չի բացառվում, որ այդ ծրագրում Պուտինը մյուսներից առաջ է անցել:

Դրանով կարելի է բացատրել Կրեմլի՝ այդչափ հետաքրքրության ընդգծված աստիճանը Ադրբեջանի առաջին փոխնախագահ՝ Մեհրիբան Ալիևայի նկատմամբ: Չի կարելի բացառել, որ Պուտինն արդեն իսկ իրականացնում է՝ Իլհամ Ալիևին Մեհրիբան Ալիևայով փոխելու է «օպերացիան»:

Թամար Բագրատունի