Փաշինյանի հեղափոխության գինը. 50 մլն դոլար ՀԲ-ից

Համաշխարհային բանկի գործադիր տնօրենների խորհուրդը նոյեմբերի 21–ին հաստատել է Հայաստանին 45.8 միլիոն եվրո (50 միլիոն ԱՄՆ դոլար) նոր վարկի հատկացումը: 50 միլիոն դոլարը ՎԶՄԲ վարկը Հայաստանը կստանա 25.5 տարի մարման ժամկետով, որից 14.5 տարին արտոնյալ ժամանակահատված է:
«Հայաստանի կառավարմանն ուղղված զարգացման քաղաքականության գործառնություն» (DPO) բյուջետային աջակցության ծրագրի շրջանակում տրվող վարկը կառավարությունը կօգտագործի մի քանի ուղղությամբ: Նախատեսվում է աջակցություն տնտեսական, հարկաբյուջետային և հանրային հատվածի կառավարմանը՝ բարելավելով մրցակցությանը, առևտրին միտված և որակի պարզեցված կարգավորումներն ու ընթացակարգերը, կատարելագործելով եկամուտների ներգրավման և հանրային ներդրումների արդյունավետությունը և հզորացնելով հակակոռուպցիոն նախաձեռնությունները և արդարադատության համակարգի ու քաղաքացիական ծառայության կատարողականը:
<<Նոր վարկավորումը հաջորդում է թույլ կառավարման և կոռուպցիայի դեմ 2018 թ. անցկացված համատարած բողոքի ակցիաներին, որոնց գագաթնակետը խաղաղ և պատմական «թավշյա» հեղափոխությունն էր։ Նորընտիր կառավարությունը, զինված փոփոխության իրականացման հզոր մանդատով, առաջադրեց հնգամյա բարեփոխումների հավակնոտ ծրագիր, որի նպատակն է մրցակցության բարելավումը և տնտեսական աճի խթանումը՝ միաժամանակ բավարարելով ժողովրդի՝ լավ կառավարման, թափանցիկության բարձրացման, հաշվետվողականության և արդյունավետ հանրային ծառայությունների պահանջները>>,- նշված է Համաշխարհային բանկի տարածած մամուլի հաղորդագրությունում:
Փաստորեն Նիկոլ Փաշինյանի թավշյա հեղափոխության գինը աշխարհի ֆինանսական գերխոշր կառույցների կողմից նոր-նոր է տրվում` կոնկրետ ՀԲ-ն այն գնահատել է 50 մլն դոլար, այն էլ ոչ թե դրամական աջակցություն, այլ արտոնյալ վարկ:
Նկատենք նաև, որ 1992 թ-ից առ այսօր. Համաշխարհային բանկը Հայաստանին մոտավորապես 2, 5 մլրդ դոլար է հատկացրել:

Հայկ Դավթյան