Մի դիմում էլ դու գրիր

Ոստիկանապետի տեղակալ, գնդապետ Հովհաննես Քոչարյանն ազատվել է պաշտոնից: Մամուլում և սոցիալական ցանցերում տեղ գտած մեկնաբանությունների համաձայն` պաշտոնանկության պատճառը երկու օր առաջ Ազգային ժողովում փոխոստիկանապետի արած հայտարարությունն է այն մասին, որ ոստիկանությունը չի կիսում ուժայինների` ոստիկանության, ԱԱԾ-ի ղեկավարների քաղաքականացումը:

Հոկտեմբերի 22-ին «Հետհեղափոխական Հայաստան. ոստիկանության բարեփոխումների տեսլականը և օրակարգը» խորագրով քննարկման ժամանակ նա լրագրողների հետ զրույցում ասել էր. «Ոստիկանության կարծիքը չի համընկնում նախագծի հեղինակների կարծիքի հետ: Մենք մեր կարծիքն ունենք Ոստիկանության կազմակերպման և գործունեության կարգի վերաբերյալ ու ռազմավարության ծրագրի հրապարակումից հետո բոլորը կկարողանան ծանոթանալ դրան: Դրանում մանրամասն հիմնավորել ենք` ինչպես ենք տեսնում Ոստիկանության կառուցվածքը, ինչպես ենք պատկերացնում նրա նկատմամբ քաղաքական վերահսկողության մեխանիզմները»,- նշել էր Քոչարյանը և հավելել, որ ոստիկանությունը բացասական եզրակացություն է տվել նախագծին:
Քոչարյանը բավականին հստակ և փաստարկված քննադատել է այդ նախագիծը և հայտնել իր անհամաձայնությունն առ այն, որ 25 տարեկանը լրացած ցանկացած քաղաքացի, որը 4 տարի ապրել է Հայաստանում, կարող է դառնալ ԱԱԾ տնօրեն կամ ոստիկանապետ։

Փոխոստիկանապետը նշել էր, որ այդ նախագծի ընդունումը պայմանավորված է քաղաքական նպատակահարմարությամբ. «Իհարկե, կիսում եմ նաեւ հեղինակի կարծիքը, որ ոստիկանական առկա պաշտոններն ավելի շատ քաղաքական ազդեցությունների հակվածություն ունեն, այդ մասով, կարծում եմ, ճշմարտություն կա, բայց դա արձանագրելով ու գնահատելով, այնուամենայնիվ, կարծում եմ, որ այլ լուծումներ էին պետք: Սա Ոստիկանության դիրքորոշումն է: Ասեմ, որ Կառավարությունը բացասական եզրակացություն էր տվել, մեր առարկությունները համապարփակ դրված էին, բայց քանի որ ԱԺ-ն այլ որոշում է կայացրել, ուրեմն մեզ մնում է հարգանքով վերաբերվել ԱԺ-ի քաղաքական որոշմանը»,- ասել էր նա և ավելացրել, թե չի կիսում այն մոտեցումը, թե այս փոփոխություններով ոստիկանության նկատմամբ պառլամենտական վերահսկողության ինստիտուտն ուժեղացվում է. «Բոլորովին ոչ: Սահմանադրությունը արգելքներ է նախատեսում, եւ մինչեւ սահմանադրական փոփոխություններ չլինեն, դա իրականություն չի դառնա։ Կարծում եմ, որ առկա մոդելը որոշակի փոփոխությունների պարագայում ավելի արդյունավետ կգործի»։
Եվ ահա այս հայտարարությունից ընդամենը 2 օր հետո 45 տարեկան պրոֆեսիոնալ ոստիկանության ծառայողն ազատվում է աշխատանքից: Ըստ տեղեկությունների` նա ազատման դիմում է գրել ոչ թե իր կամքով, այլ ոստիկանության պետի ժամանակավոր պաշտոնակատար Արման Սարգսյանի առաջարկ-հորդորով։ Դե, իսկ Սարգսյանի առջև նման պահանջ է դրել ՀՀ վարչապետ Նիկոլ Փաշինյանը: Պարզ է, որ Փաշինյանին դուր չի եկել փոխոստիկանապետի դիրքրոշումը ոստիկանապետի և ԱԱԾ պետի պաշտոնը քաղաքական պաշտոնի վերածելու որոշումը:
Փոխոստիկանապետ Քոչարյանի ազատումը շատ հստակ ցույց է տալիս, որ Նիկոլ Փաշինյանը որևէ քննադատություն, որևէ հակափաստարկ կամ այլ մոտեցում, չի ընդունում: Նրա համար կա և գործում է սեփական որոշումների ճշմարտացիությունն ու անքննելիությունը: Պրոֆեսիոնալ կարծիքը, մասնագիտական գնահատականը նրա համար ունի զրո արժեք: Կատարվածը նաև ուսուցողական և պրոֆիլակտիկ նշանակություն ունի. ցանկացած մեկը, ով կհամարձակվի հեղափոխության առաջնորդի մոտեցմանը չհամընկնող մասնագիտական դիրքորոշում հայտնել, հաջորդ օրն ևեթ ազատման դիմում կգրի:
Ահա այն ամենը, ինչ պետք է իմանալ թավշյա հեղափոխության և նոր Հայաստանի սիրո և հանդուրժողականության դեմոկրատիայի մասին:

Հայկ  Դավթյան