Դպրոցների փակվելը նախարարների 1,5 մլն աշխատավարձին վնաս չէ

Գեղարքունիքի մարզի Գեղաքար գյուղի միջնակարգ դպրոցն առաջիկայում կմիավորվի Խաչաղբյուր գյուղի միջնակարգ դպրոցին, երբ ՀՀ կառավարության կողմից կընդունվի համապատասխան որոշումը:

Գեղարքունիքի մարզպետ Գնել Սանոսյանը, «Արմենպրես»-ի հետ զրույցում նշել է, որ Գեղաքարի միջնակարգ դպրոցը տարիներ շարունակ գործել է ընդամենը 1 աշակերտով, ընդ որում այդ մեկ աշակերտը նույն գյուղի բնակիչ չէ, այլ Արարատի մարզի Մասիս համայնքում բնակվող ընտանիքից է՝ դպրոցի տնօրենի եղբոր երեխան: Նա հիմա տեղափոխվել է Մասիս՝ իր ծնողների մոտ եւ կրթությունը շարունակում է այնտեղ: Այժմ Գեղաքարում բնակվող մի քանի ընտանիքներից մեկում միայն կա մեկ դպրոցահասակ երեխա, ում շնորհիվ դեռ Գեղաքարի միջնակարգ դպրոցը շարունակում է գործել: Գեղարքունիքի մարզպետարանը, ելնելով ստեղծված իրավիճակից, առաջարկություն է ներկայացրել կառավարություն՝ Գեղաքարի միջնակարգ դպրոցը Խաչաղբյուրի միջնակարգ դպրոցին միավորելու վերաբերյալ:
«Մենք հանգեցինք նման որոշման, որովհետեւ Գեղաքարում առաջիկա տարիների ընթացքում մնալու է նույն մեկ աշակերտը: Այդ նշանակում է, որ այդ երեխան այդ դպրոցում չունի ընկեր ու խաղընկեր, չի շփվի ոչ մեկի հետ, դասերը սովորելու համար հետաքրքրություն քիչ կցուցաբերի: Այդ երեխային կտրամադրվի մեքենա, որը նրան կտեղափոխի Խաչաղբյուրի դպրոց եւ դասերից հետո կբերի տուն: Այդ դեպքում երեխան կունենա դպրոցական միջավայր, արդյունավետ ուսում կստանա, իսկ պետբյուջեում տարվա կտրվածքով կխնայվեն ոչ քիչ միջոցներ, որոնք կծախսվեն շատ ավելի նպատակային»,- ներկայացրել է մարզպետը:
Այս տեղեկությունից ընդամենը մեկ օր առաջ հայտնի դարձավ, որ վարչապետի գաղտնի հրահանգով ավելի քան կրկնակի բարձրացվել է նախարարների, փոխնախարարների և նախարարությունների գլխավոր քարտուղարների աշխատավարձերը: Առաջին հայացքից թվում է, թե այս երկու իրադարձությունների միջև որևէ առարկայական կապ չկա: Բայց միայն առաջին հայացքից: Բանն այն է, որ աշխատավարձերի բարձրացումն արվել է աշխատանքի արդյունավետությունը գնահատելու, էլ ավելի խրախուսելու նպատակով: Համենայն դեպս, վարչապետ Նիկոլ Փաշինյանը իր հրապարակային խոսքում տարբեր առիթներով ասել է, որ արդյուանվետ կառավարման համար արժանապատիվ աշխատավարձեր պետք է սահմանվեն: Իսկ ի՞նչ չափանիշներով է որոշվում կառավարության և մասնավորապես 1,5 մլն դրամ աշխատավարձ ստացող նախարարների աշխատանքի արդյունավետեությունը: Եթե Գեղաքարի միջնակարգ դպրոցը տարիներ շարունակ գործել է ընդամենը 1 աշակերտով, գյուղում էլ ընդամենը մի քանի ընտանիք է բնակվում, արդյո՞ք մեր երկրի տարածքային կառավարման նախարարը, աշխատանքի և սոցիալական հարցերի նախարարը, էկոնոմիկայի նախարարը և նույն Գեղարքունիքի մարզպետը լավ են աշխատել: Կամ եթե երկրում դպրոց է փակվում,  կրթության նախարարն արդյոք լա՞վ է աշխատում: Միանշանակ ոչ: Նշված պաշտոնյաների աշխատանքն արդյունավետ կլիներ միայն այն դեպքում, եթե Գեղաքարում վերջին մեկ տարվա մեջ գոնե մեկ-երկու նոր ընտանիք վերաբնակեցվեր, գոնե այդ գյուղում ինչ-որ բիզնես կամ արտադրություն հիմնվեր, ֆերմա բացվեր, աշխատատեղ ստեղծվեր, որ ի վերջո տարածքային համաչափ զարգացում ասվածը լոզունգից գործի վերածվեր և վերջապես գյուղում երեխա ծնվեր և դպրոցն էլ չփակվեր:
Եթե գյուղերը շարունակում են մեռնել, ինչպես նախկինում, եթե դպրոցներն աշակերտ չունենալու պատճառով շարունակում են փակվել, ինչպես նախկինում, նշանակում է կառավարությունը, վարչապետն ու նախարարները, մեղմ ասած, այնքան էլ լավ չեն աշխատում, ինչպես նախկինում: Իրենք իրենց 1,5 մլն դրամ աշխատավարձ տալու փոխարեն` թող Գեղաքարում գործ դնելու համար, օրինակ` 5 մլն դրամի բյուջետային աջակցություն տան և դրանով փրկեն մեռնող գյուղը: Գեղաքարն, ի դեպ, եզակի օրինակ չէ, նման գյուղեր կան գրեթե բոլոր մարզերում: Փաստորեն դպրոցների փակվելը նախարարների 1,5 մլն աշխատավարձին վնաս չէ:

 Հայկ  Դավթյան