Ապրիլյան քառօրյա պատերազմից հետո երկրում ստեղծվել է նոր իրավիճակ. պատգամավոր

ԱԺ նիստում հայտարարությունների ժամին ՀԱԿ խմբակցության ղեկավար Լևոն Զուրաբյանը հայտարարեց, թե ապրիլյան քառօրյա պատերազմից հետո երկրում ստեղծվել է նոր իրավիճակ, որն օրըստօրե փոխվում է:Ըստ նրա` հանրությունն ամենայն սրությամբ ընկալել է պետական ինստիտուտների անհամարժեքությունն առկա մարտահրավերներին: Ինչպես նշեց՝ ժողովուրդը չի կարող հավատալ պետական իշխանությանը, որի ընտրությունն ինքը չի կատարել: «Իշխանությունը պետք է սթափ գնահատի իրողությունները, դադարեցնի իշխանությունից կառչել՝ նույնիսկ ինքնապաշտպանության բնազդի տեսակետից: Ծանր վիճակից դուրս գալու համար միակ ելքը փոխհամաձայնեցված, կառավարելի անցումն է դեպի ժողովրդավարություն, ազատ, արդար ընտրություններով ժողովրդի կողմից ընտրված իշխանությունը: Միայն այս դեպքում Հայաստանը նորից կդառնա իր բոլոր քաղաքացիների երկիրը: Առաջին քայլը պետք է  դառնա Ընտրական օրենսգրքի շուրջ իշխանության, ընդդիմության ու քաղաքացիական հասարակության կոնսենսուսը»,- նշեց Լևոն Զուրաբյանը: Նա նշեց, որ այսպես շարունակել չի կարելի, և թեկուզ միայն մեր հայրենիքի զինվորների և բնակչության անվտանգության ապահովման համար պետք է վերափոխել ՀՀ պետական համակարգը, վերացնել պետական լծակների օգտագործումը պաշտոնյաների կողմից, վերացնել թալանը, կոռուպցիան: