Տուժածների հարազատները հավաքված են վերակենդանացման բաժանմունքի մոտ

«Արմենիա» հանրապետական բժշկական կենտրոնի վերակենդանացման բաժանմունքի առջև այս պահին հավաքված են երեկ Հալաբյան փողոցում ավտուբուսում տեղի ունեցած պայթյունի հետևանքով վիրավորվածների հարազատները։ Հիվանադանոցում է նաև վնասվածք ստացած հղի կնոջ մայրը՝ Մարգո Եղիկյանը, ով լրագրողներին հայտնեց, որ դեռ չի հասցել տեսակցել դստերը։ Նրա խոսքով՝ իրենց տեղեկացրել են, որ աղջկան և պտղին վնաս չի հասցվել։ Մարգո Եղիկյանը նշեց, որ աղջիկը 37 տարեկան է, ունի 6 տարեկան երեխա։ Պատասխանելով հարցին, թե ո՞ւր էր գնում դուստրը, նա ասաց. «Ինքը 10 րոպե առաջ ինձ հետ խոսեց, ասաց՝ մամա, ատամնատեխնիկի մոտից դուրս ենք գալիս։ 10 րոպե հետո երբ հեռուստացույցը միացրի, մեկ էլ տեսա այդ ավտովթարը, որ ասացին մեջը հղի կա, ես ինձնից անկախ՝ չգիտեմ ինչի, ասացի, եթե կա՝ իմ երեխան է»։