Դավիթ Տոնոյանի պաշտոնանկության ոդիսականը

Դավիթ Տոնոյանի պաշտոնանկության մասին Irakanum.am-ի հրապարակած լուրը իսկական փոթորիկ բարձրացրեց քաղաքական եւ հասարակական շրջանակներում: Լրատվամիջոցը հղում անելով հավաստի աղբյուրներին գրել էր, որ
ՀՀ վարչապետ Նիկոլ Փաշինյանը կառավարությունում հանդիպում է ունեցել Պաշտպանության նախարար Պաշտպանության նախարար Դավիթ Տոնոյանի հետ, և տեղեկացրել, որ վերջինս ազատվում է զբաղեցրած պաշտոնից:

«Փաշինյանը համապատասխան որոշումն արդեն իսկ ուղարկել է նախագահ Արմեն Սարգսյանին»,- գրված էր կայքի հրապարակման մեջ:
Լուրը մոտ երկու ժամ անորոշ մնաց, պաշտոնական որեւէ խողովակով հնարավոր չէր լինում հերքում կամ հաստատում ստանալ: Վարչապետի մամուլի խոսնակը լռում էր, ՊՆ-ից հայտնում էին, թե Դավիթ Տոնոյանը աշխատանքի է, ինքը՝ Տոնոյանն էլ ասաց, որ ոչ մի բան ասել չի կարող, ոչ կհերքի, ոչ կհաստատի, ինքն այս պահին շարունակում է աշխատանքը: Իսկ նախագահականից էլ վստահեցնում էին, որ չեն ստացել հրաժարականի միջնորդություն: Ի վերջո, վարչապետ Փաշինյանը լրագրողների հետ զրույցում հերքց լուրը՝ անհեթեթություն որակելով այն:
Միայն այդ հերքումից հետո ակտիվացան մամուլի խոսնակները ու տարածվեցին խրոխտ հերքման տեքստեր:

Այս ողջ ընթացքից պարզ դարձավ, որ իրականում լուրերն անհիմն չէին, առավել եւս անհեթեթ, այլապես պատկան գերատեսչությունները չէին անցնի խորը ընդհատակ ու դուրս չէին գա միայն վարչապետի հերքումից հետո: Ավելի վաղ լրատվամիջոցները գրել էին, որ Վանեցյանի հրաժարականից հետո ուժային կառույցների ղեկավարներ Վալերի Օսիպյանն ու Դավիթ Տոնոյանն էլ են հեռանալու: երկուսը հեռացան, իսկ Տոնոյանը՝ ոչ: Համատարած այդ լռությունը գաղտնազերծեց այն, որ իրականում Տոնոյանին հեռացնելու մտադրություն վարչապետն ունեցել է, այդ մասին հայտնի է նաեւ Տոնոյանին, սակայն ինչ-որ բան փաստորեն ետ պահեց Փաշինյանին չգնալու այդ քայլին:
Չի բացառվում, որ իշխանությունը ինֆորմացիոն <<բադիկի>> միջոցով փորձում էր հասարակական կարծիք ստուգել, ի վերջո, չի կարող բոլոր հեռացողներին գլուխները եփել մի կաթսայում եւ հայտարարել, թե նախկինների հետ ունեցած կապը նրանց կաշկանդում էր աշխատել: Վանեցյանի պաշտոնանկությունը մի կերպ, զոռով-շառով փորձում են մարսել՝ ազգի դավաճան հռչակելով վերջինիս, բայց ինչ պետք է ասեն Տոնոյանի պարագայում, բանակն անսասան կատարում է իր առջեւ դրված խնդիրները, զինված ուժերի ղեկավարն էլ իր գործի գիտակ է, այդ մասին են վկայում տարատեսակ սոցհարցումները, որոնց արդյունքում Դավիթ Տոնոյանը առնվազն վարկանիշայինների եռյակում էր Վանեցյանի եւ Փաշինյանի կողքին: Պատահական չէ, որ Տոնոյանի հրաժարականի մասին ոչ պաշտոնական լուրի հրապարակումից հետո էլ հանրության տարբեր շրջանակներ չթաքցրեցին իրենց զայրացած վերաբերմունքը:

Ամենայն հավանականությամբ իշխանությունը ստուգում էր հանրության վերաբերմունքն առ Դդավիթ Տոնոյան ու հասկանալով, թե ինչ կարող է լինել, ետքայլ արեց: Սակայն ՊՆ-ում կասկած չունեն, որ Տոնոյանի հեռացումը շաբաթների կամ ամիսների հարց է, փաստարկում են, որ հակառակ պարագայում Տոնոյանը Մանվել Գրիգորյանի հրապարակային պաշտպանությամբ հանդես չէր գա: Կարելի է կանխատեսել, որ իշխանությունը կսկսի Տոնոյանի վարկաբեկման գործընթաց, որպեսզի հեռացումը իր համար ցավոտ չլինի ու հասարակությունը չգրոհի իշխանության վրա:

Անի Սահակյան